Die Schedelsche Weltchronik (deutsch):156

155 <<<Vorheriges Blatt	Die Schedelsche Weltchronik    Blatt CLVI	Nächstes Blatt>>> 157
unkorrigiert	Dieser Text wurde noch nicht Korrektur gelesen. Allgemeine Hinweise dazu findest du bei den Erklärungen über Bearbeitungsstände.

 

CLV verso:

Das sechst alter

ERffurt die groß vnnd gedechtnußwirdig statt ein hawbt Thu^eringer lannds von den alten Erphesfurt genant hat einen hohen berg den man sant peters nennet. dann als von den zeitten theodosij des kaisers vnder archadio vnd honorio den kaisern die naygung des kaiserthumbs vrsprung het do haben die franckreichischen die verweser oder anwelt der ro^emer vomb rein gegen welschen landen wartz abgeworffen vnd sich einem aignen ko^enig vndertanig gemacht. Als die Thu^ering solchs vernamen do erweleten sie inen vomb andern tayl des Reyns gegen dem auffgang auß rat des ko^enigs zu franckreich Merwigum seinen freu^end zu eim ko^enig. Derselb pawet ein burg auff demselben berg vnd ein geschloß bey erffurt das yetzo sant dionisien kirch ist. das der gemayn man Nerwißburg nennet. Nach diss ko^enigs absterben empfieng Bassinus in thu^eringen das reich. Dess weib darnach Hildericus der ko^enig zu franckreich ime vermehlet. Zu denselben zeitten stund das dorff schildinrode an dem ende do yetzo sant Andreßen kirch ist. So het in dem pru^eel bey dem wasserfluss Gera (der yetzo durch die statt vnd schier neben der halben stat hinfleu^eßt. von dess geprewchlichkeit die gantz statt gerainigt vnd fast geziert wirdt ein namhafftger wolberu^embter muu^elner sein durchfart. derselb mu^elner hieß erpff. so was ettwen bey seiner mu^el ein durchgang oder furt. Vnd als nw nach der gepurt christi .iiii^c. iar zu den zeiten Clodouei des ko^enigs zu franckreich dise statt iren anfang gehabt hat do ist sie von des mu^elners namen vnd von dem furt Erphesfurt genannt worden. Dieweil darnach der edel Franckreichisch ko^enig Dagobertus regiret hat derselb auß der burg auff dem berg ein scho^ens closter sant benedicten ordens in sant peters ere (dannnenher es sant peters berg genant ist) gepawen. vnd auch sant Gangolfs kirchen begabet. Als aber nachfolgend der ertzbischof zu maintz bonifacius vnder pipino dem franckreichischen ko^enig thu^eringer land zum glawben bekeret het do pawet er der gloriwirdigen vnd alweg iunckfrawen marie kirchen vnd ordnet daselbst ein bischofthumb das alßpald dem stu^ol zu mayntz gewichen hat. Dise statt ligt in eim gar gu^oten flu^or vnd fruchtpern erdpodein. der tregt ein krawt waydt genant. zu ferbung der tu^echer fast dienstlich. Durch des felder fließen die gera vnd andere wasserflu^ess die die gegent fruchtperlich befeu^echtigen. Darumb ist auch alda ein vberflu^eßige vihwayd. Dise statt ist nachfolgend nach dem tausentisten vnd sechßundsechtzigsten iar mit mawrn vmbfangen vnd mit thu^ernen bewaret worden. Vnd hat an wonungen. hewßern vnd ho^efen der burger. vnd an gezierden der clo^ester vnd kirchen wunderperlich zu^ogenomen. Dise statt ist auch ein gewo^enlicher stu^ol der thu^ering gewest. als die. die schier in dem mittel dess lands gelegen vnd an getraydt vnd andern nottu^erftigen dingen vberflu^eßig ist. vnd nach dem dise gegent vnd statt der zehenden gefreyet was so hat sie derselben sachhalben vil widerwillens vnd angst von iren nahend geseßnen fu^ersten erlidden. vnnd sunderlich zu den zeitten kaiser heinrichs des dritten. Derselb pawet auff alle berg vnd ho^ehe in sachßen vnd thu^eringen große be-

CLVI recto:

der werlt

Blat CLVI

festigung vnd geschlo^eßlein. vnnd leget darzu ein stewr auff. aber do die nit genu^ogsam waren do verhenget er das man auß den nahsten do^erffern vnd feldern feyntlicher weiß angreiffen vnd die lewt allenthalben daselbst vmb wonende zu bewarung vnd befestigung der fu^ergenomen gepewe bezwingen solt. vnd auff das er an offenlicher wu^eetterey nit verlupft wu^erde vnd sein vngu^eetigkeit in gestalt eins gu^oten bedecken mo^echt. so raytzet er den mayntzischen ertzbischof in alle weg das er die zehenden zu thu^eringen (als er vormals offt fu^ergenomen het) erfordern solt dar zu wolt er ime hilff vnd beystand thun vnd die widerspenigen mit ko^enigclichem gewalt dar zu zwingen. doch mit dem geding das er ime zu volziehung der fu^ergenomnen gepew einen teil solcher zehenden geben solt. dem nach beru^eeffet der bischoff ein versamlung gein Erphesfurt. daselbsthin komen auff den ernenten tag. der ko^enig. der ertzbischoff vnd bischoff herman von bamberg. vnd andere. die zu außtrag vnd entschyde der sachen beru^eeft waren. do stund der thu^ering hoffnung vnd zuuersyht allermaist in dem abbt zu fulden vnd zu hernelden die dann vil zehendperer kirchen vnd gu^eetter in thu^eringen hetten. vnd als dieselben zu raichung der zehenden offenlich angefordert warden do baten sie erstlich vmb gots willen den ertzbischoff das er das. das vor alter den clo^estern gegeben worden wer vnuerruckt bleiben ließ. das dann auch der bebstlich stu^ol mit alten vnd newen schriften mermals bestettigt het. vnd auch sein vorfarn ertzbischoff zu maintz zeuerletzen nye fu^ergenomen hetten. Als aber der ertzbischoff von seinem fu^ernemen nit absteen wolt do beru^effeten sich die thu^ering an den bebstlichen stu^ol. aber der ko^enig verbote es bey straff des leibs mit tod. Darnach entstund der sachsisch krieg vnd beschahe hinnach kein forderung einichs zehenden. do freweten sich die thu^ering das sie vrsach hetten gefunden das sie die gesetze inen von iren eltern gegeben mit ritterlicher hand beschirmeten. dess beku^emeret sich der ko^enig also hart dz er schier dz ko^enigreich mit dem leben verlorn het. In diser statt sind vil leichnam der heilligen durch hohberu^embt mann bestattet. Nemlich der heilligen bischoff Adolarii Eobani Seueri vnd vincencie. den sie auch weyt kirchen vnd tempel gepawt haben. Nach der gepurt christi tausent .iii^c. vnd in dem .xcii. iar hat die lo^eblich hoh schu^ol daselbst anfang gehabt. Von dannnenher yezuzeiten vil treffenlicher vnd hohgelerter mann der heilligen schrift. der rechten. der ertzney vnd philozophey gefloßen sind. Dise beru^embt statt hat mermaln große beschedigung vnd farlichkeit durch prunst erlidden. Vnd sunderlich in dem iar christi tausent .iiii^c. lxxii. an sant Gernasii tag ist dise statt mit fewr an der gloriwirdigen iunkfrawen marie vnd sant Seuers kirchen auff der kremer prugken amm ru^oben marckt vnd vor den graden den also beschedigt worden das schier der dritteil durch prunst vergienge.

---