Doctor Brants Narrenschiff/Den falben Hengst streichen

« Vom Verfall des Glaubens	Sebastian Brant Doctor Brants Narrenschiff	Vom Ohrenblasen »
fertig Fertig! Dieser Text wurde zweimal anhand der Quelle Korrektur gelesen. Die Schreibweise folgt dem Originaltext.
Für eine seitenweise Ansicht und den Vergleich mit den zugrundegelegten Scans, klicke bitte auf die entsprechende Seitenzahl (in eckigen Klammern).

[137r] Wer yetz kan strichen wol den hengst Vnd ist zuo allem bschisß der gengst Der meynt zuo hoff syn aller lengst von falben hengst strichen Mir kem eyn verdeckt schiff yetz recht Dar jnn ich setzt der herren knecht Vnd ander die zuo hoff gont schlecken Vnd heimlich by den herren stecken [137v] 5 Do mit sie saessen gar alleyn Vnd vngetrengt von der gemeyn Dann sie sich nit wol moegen lyden Der eyn klubt faedern / der stricht kryden Der liebkosßt / der runt jnn die oren 10 Das er vff kum jn kurtzen joren Vnd sich mit daeller schlecken ner / Mancher durch lyegen würt eyn herr Dann er den kutzen strichen kan Vnd mit dem falben hengst vmb gan 15 Zuo blosen mael ist er geschwynd Den mantel hencken gen dem wynd Zuodütlen hilfft yetz manchem für Der sunst lang zyt blib vor der thür Wer schlagen kan / hor vnder woll 20 Der selb zuo hoff gern bliben soll Do ist er worlich lieb / vnd werd Der erberkeyt man do nit bgert Mit torheyt duont sie all vmb gon Went mir die narrenkapp nit lon 25 Doch striglet mancher offt so ruch Das jnn der hengst schmytzt jn den buch Oder gyt jm eyn dryt jnn die ryppen Das jm das daeller felt jn die kryppen Der selben wer guot muessig gon 30 Wann man sunst wißheyt wolt verston / Wann yeder wer / als er sich stelt Den man für frumm / vnd redlich helt Oder stel sich als er dann wer Vil narren kappen stünden laer [138r] Eyn zeychen der lichtferikeyt Ist / glouben was eyn yeder seyt Eyn klapperer bald vil lüt vertreyt Von oren blosen. Der ist eyn narr / der vasßt jnns houbt Vnd lichtlich yedes schwaetzen gloubt Das ist eyn anzeig zuo eym toren Wann eyner dünn / vnd witt hat oren