Doctor Brants Narrenschiff/Selbstgefälligkeit

Des narren bry / ich nye vergaß
Do mir gefiel das spiegel glaß
Hans esels or / min bru^oder was

Der ru^ert jm wol den narren bry
Wer wa^enet das er witzig sy
Vnd gefelt alleyn jm selber woll
Inn spiegel sicht er yemertol

Vnd kan doch nit gemercken das

Das er eyn narren sicht jm glaß
Doch wann er schweren solt ein eyt
Vnd man von wiß vnd hüpschen seyt
So meint er doch er wers alleyn

Man find sins glich vff erden keyn

Vnd schwu^er ouch / jm gebrest gantz nüt
Syn du^on vnd lon / gfelt jm allzyt
Den spiegel er nit von jm latt
Er sytz / lyg / ritt / gang / wo er statt /

Glich als der keyser Otto dett

Der jn dem stritt eyn spiegel hett
Vnd schar all tag syn backen zwilch
Vnd wu^osch sie dann mit esels milch
Das ist ein wiberta^eding gu^ot

Keyn on den spiegel ettwas du^ot

Ee sie sich schleygeren recht dar vor
Vnd mutzen / gat wol vß eyn jor
Wem so gefelt wiß / gstalt / vnd werck
Das ist der aff von Heydelberck

Pygmalion gfiel syn eigen bild

Des wart er jnn narrheyt gantz wild
Hett sich Narcissus gspieglet nit
Er hett gelebt noch lange zyt
Manches sicht sta^ets den spiegel an

Sieht doch nüt hüpsches dar jnn stan

Wer also ist ein narrecht schoff
Der lidt ouch nit das man jn stroff
Jo gatt er jnn sym wesen hyn
Vnd wil mit gwalt / nit witzig syn