Doctor Brants Narrenschiff/Vom nächtlichen hofieren

Wer vil lust hatt / wie er hofier
Nachtz vff der gassen / vor der thu^er
Den glust / das er wachend erfru^er

Jetz wer schyer vß der narren dantz
Aber das spyel wer nit all gantz
Wann nit hie weren ouch die lo^effel
Die gassentretter / vnd die go^effel

Die durch die nacht keyn ru^ow went han

Wann sie nit vff der gassen gan
Vnd schlagent luten vor der tu^er
Ob gucken well die ma^etz har fu^er
Vnd kumen vß der gassen nit

Biß man eyn kammer loug jnn gytt

Oder sie würfft mit eym steyn
Es ist die freüd jn warheyt kleyn
Inn winters na^echt also erfryeren
So sie der go^euchin du^ont hofyeren

Mit seitten spyel / mit pfiffen / syngen

Am holtzmarckt über die blo^echer springen
Das du^ont studenten / pfaffen / leyen /
Die pfiffen zu^o dem narren reyen
Eyner schrygt / juchtzet / bro^ellt vnd blo^ert

Als ob er yetzend würd ermo^ert

Je eyn narr do dem andern seyt
Wo er mu^eß wartten vff bescheyt
Do mu^oß man jm dann hoffrecht machen
Als heymlich halttet er syn sachen

Das yederman do von mu^oß sagen

Die vischers vff den küblen schlagen
Mancher syn frow loßt an dem bett
Die lieber kurtz wil mit jm hett
Vnd dantz er an dem narren seyl

Nymbt das gu^ot end / so darff es heyl

Ich schwig der / den das selb gyt freüd
Das sie louffen jm narren kleyd /
Wann man eyn narren gyene hieß
Mancher sich an den namen styeß