Doctor Brants Narrenschiff/Von Aberglauben

Vil abergloub man yetz erdicht
Was künfftig man an den sternen sycht
Eyn yeder narr sich dar vff richt

Der ist eyn narr der me verheißt
Dann er jn sym vermo^egen weysßt
Oder dann er zu^o tu^on hat mu^ot
Verheissen ist den artzet gu^ot

Aber eyn narr verheisßt ein tag

Me / dann all welt geleysten mag
Vff künfftig ding man yetz vast lendt
Was das gestyrn vnd firmmaent
Vnd der planeten louff vnß sag

Oder gott jnn sym rott anschlag

Vnd meinent / das man wissen so^ell
Als das gott mit vnß würcken wo^ell
Als ob das gstyrn eyn notdurfft bring
Vnd jm noch mu^eßten gan all ding

Vnd gott nitt herr vnd meyster wer

Der eyns licht macht das ander schwa^er
Vnd laßt das vil Saturnus kindt
Dannacht gerecht / frumm / heylig syndt
Dar gegen Sunn / vnd Jupiter

Hant kind die nit syndt boßheyt la^er

Eym kristen menschen nit zu^o stat
Das er mit heyden kunst vmb gat
Vnd merck vff der planeten louff
Oder diser tag sy gu^ot zu^om kouff /

Zu^o buwen / krieg / machung der ee /

Zu^o früntschafft / vnd des glichen me
All vnser wort / werck / tu^on vnd lon
Vß gott / jnn gott / alleyn sol gon
Dar vmb gloubt der nit recht jnn got /

Der vff das gestyrn solch glouben hat

Das ein stund / monet / tag vnd jor
So glücklich sy / das man dar vor
Vnd nach / sol grosß anfohen nüt
Wann es nit gschicht die selbe zyt

Das es dann nim geschehen mag

Dann es sy ein verworffen tag /
Vnd wer nit ettwas nüwes hat
Vnd vmb das nüw jor syngen gat /
Vnd gryen tann riß steckt jn syn huß

Der meint er leb das jor nit vß

Als die Egyptier hielten vor /
Des glichen zu^o dem nuwen jor
Wem man nit ettwas schencken du^ot
Der meynt das gantz jor werd nit gu^ot /

Vnd des glich vngloub allerley

Myt worsagen / vnd vogelgschrey
Mitt caracter / sa^egen / treümerbu^och
Vnd das man by dem monschyn su^och
Oder der schwartzen kunst noch stell

Nüt ist das man nit wissen well

So yeder schwu^er / es fa^elt jm nit
So fa^elt es vmb eyn buren schrytt
Nitt das der sternen louff alleyn
Sie sagen / jo eyn yedes kleyn

Vnd aller mynst jm fliegen hirn

Will man yetz sagen vsß dem gestirn
Vnd was man reden / rotten werd
Wie der werd glück han / was geberd /
Was willen / zu^o fall der kranckheit

Fra^euelich man vß dem gstirn yetz seit /

Inn narrheyt ist all welt ertoubt
Eim yeden narren man yetz gloubt
Vil practick vnd wissagend kunst
Gatt yetz vast vß der trucker gunst

Die druckent alles das man bringt

Was man von schanden sagt vnd singt
Das gatt nu^on als on stroff do hyn
Die welt die will betrogen syn /
Wann man solch kunst yetz trib vnd lert

Vnd das nit jnn vil boßheyt kert

Oder sunst bra^echt schad der sel /
Als Moyses kund vnd Daniel /
So wer es nit eyn bo^eße kunst
Jo wer sie würdig ru^oms vnd gunst

Aber man wissagt mir / das vieh sterb

Oder wie korn vnd wyn verderb
Oder wann es schnyg oder reg
Wann es scho^en sy / der wynt weg
Buren frogen noch solcher gschrifft

Dann es jn zu^o gewyn antrifft

Das sie korn / hyndersich vnd wyn
Haltten / biß es werd dürer syn
Do Abraham laß solche bu^och
Vnd jn Chaldea sternen su^ocht

Was er der gsieht vnd trostes an

Die jm gott sandt jn Chanaan
Dann es ist eyn lychtferikeyt
Wo man von solchen dingen seyt
Als ob man gott wolt zwyngen mitt

Das es mu^ost syn / vnd anders nitt

Gotts lieb verloschen ist vnd gunst
Des su^ocht man yetz des tu^efels kunst
Do Saul der künig was verlan
Von gott / ru^offt er den tüfel an