Doctor Brants Narrenschiff/Von Buhlschaft

An mynem seyl ich draffter yeüch
Vil narren / affen / esel / geüch
Die ich verfu^er betrüg vnd leych

Von bu^olschafft.

Frow Venus mit dem stro^ewen ars
Byn nit die mynst jm narren fars
Ich züch zu^o mir der narren vil
Vnd mach eyn gouch vß wem ich wil

Myn kunden nyemans nennet all

Wer hat geho^ert von Circes stall /
Calypso / der Syrenen joch
Der gedenck / was gwaltes ich hab noch
Welcher meynt das er wytzig sy

Den dunck ich dieff jnn narren bry /

Wer eyn mol würt von mir verwundt
Den macht keyn krütter krafft gesunt /
Dar vmb hab ich eyn blinden su^on /
Keyn bu^oler sicht was er sol thu^on

Myn su^on ein kyndt ist / nit eyn man

Bu^oler mit kyntheyt du^ont vmbgan /
Von jnn wirt selten dappfer wort
Glich wie von eynem kind geho^ert /
Myn su^on stat nacket vnd bloß all tag

Dann bu^olschafft nyemen bergen mag /

Bo^eß lieb die flügt / nit lang sie stat
Dar vmb min su^on zwen flügel hat /
Bu^olschafft ist lycht zu^o aller fryst
Nüt vnsta^eters vff erden ist /

Cupido treit syn bogen bloß

Vff yeder syt / ein kocher groß /
In eym / hat er vil hocken pfil
Do mit trifft er der narren vil /
Die sint scharpff / gulden / hockecht / spitz /

Wer troffen würt / der kumbt von witz /

Vnd dantzt har noch am narren holtz
Im andern ko^echer / vogelboltz
Sint stumpff / mit bly beschwert / nit lücht
Der erst macht wunt / der ander flücht

Wa^en trifft Cupido / den entzyndt

Amor syn bru^oder / das er bryndt
Vnd mag nit leschen wol die flam
Die Didoni jr leben nam
Vnd macht das Medea verbrant

Ir kind / den bru^oder dot mit jr handt

Tereus wer ouch keyn wydhopff nit /
Pasyphae den stier vermitt /
Phedra Theseo fu^er nit nach
Noch su^ocht an jrem styefsu^on schmach /

Nessus wer nit geschossen dott /

Troy wer nit kumen jn solch nott /
Scylla dem vatter ließ syn hor
Hyacinthus wer keyn ritter spor /
Leander nit syn schwymmen da^et

Messalina wer jn küscheyt sta^et

Mars ouch nit jnn der ketten la^eg
Procris der hecken sich verwa^eg
Sapho nit von dem berg abfiel
Syra^en vmbkerten nit die kyel

Circe ließ faren wol die schiff

Cyclops vnd pann nit leidtlich pfiff
Leucothoe nit wyhrouch gba^er
Myrrha wer nit Adonis schwa^er
Byblis wer nit jrm bru^oder holt

Dana^e entpfieng nit durch das golt

Nyctymine flu^eg nit vß by nacht /
Echo nit wer ein stym gemacht /
Tysbe ferbt nit die wissen bo^er
Athalanta keyn lo^ewyn wer

Des leuiten wib wer nit geschma^echt

Vnd darumb erschlagen eyn geschlecht
Dauid ließ wesschen Bersabe
Samson vertrüwt nit Dalide
Die abgo^et Salmon nit anba^et

Amon wer an synr schwester sta^et

Joseph würd nit verklagt vmb fuß
Als Bellerophon Hyppolitus
Der wiß man als eyn roß nit gyng
Am thurn Virgilius nit hyng

Ouidius hett des keysers gunst

Hett er nit gelert der bu^oler kunst
Es ka^em zu^o wißheyt mancher me
Wann jm nit wer zu^or bu^olschafft we
Wer mit frowen hat vil credentz

Dem wirt verbrennt syn conscientz

Vnd mag gentzlich nit dienen gott
Wer mit jnn vil zu^o schaffen hatt
Die bu^olschafft ist eym yeden stand
Gantz spo^etlich / na^errisch / vnd eyn schand

Doch vil scha^entlicher ist sie dann

So bu^olen du^ont alt wib vnd man /
Der ist eyn narr / der bu^olen will
Vnd meynt doch halten maß vnd zyl /
Dann das man wißheyt pfleg vnd bu^ol

Mag gantz nit ston jn eynem stu^ol /

Eyn bu^oler wirt verbla^ent so gar /
Er meynt / es na^em nyemans syn war
Diß ist das krefftigst narren krutt
Diß kappen kla^ebt lang an der hutt