Doctor Brants Narrenschiff/Von Frauenhüten

« Von Auffschub suchen	Sebastian Brant Doctor Brants Narrenschiff	Von Ehebruch »
fertig Fertig! Dieser Text wurde zweimal anhand der Quelle Korrektur gelesen. Die Schreibweise folgt dem Originaltext.
Für eine seitenweise Ansicht und den Vergleich mit den zugrundegelegten Scans, klicke bitte auf die entsprechende Seitenzahl (in eckigen Klammern).

[40v] Der huett der hewschreck an der sunn Vnd schüttet wasser jn eyn brunn Wer huettet das syn frow blib frumm Von frowen huetten Vil narren tag / vnd seltten guot Hat / wer synr frowen huetten duot Dann welch woll wil / die duot selb recht Welch übel wil / die macht bald schlecht [41r] 5 Wie sie zuo wegen bring all tag Ir boeß fürnemen vnd anschlag Leitt man eyn malschloß schon dar für Vnd bslüßt all rigel / tor / vnd tür / Vnd setz jns huß der hueter vil 10 So gatt es dennahat als es wil Was halff der thurn dar jnn Danae ging Dar für / do sie eyn kynd entpfieng / Penelope was fry vnd loß Vnd hatt vmb sich vil buoler groß 15 Vnd was jr man zwentzig jor vß Bleib sy doch frumm / jn jrem huß Der spraech alleyn / das er noch sy / Vor btrügniß syner frowen fry Der hab syn frow ouch lieb vnd holt 20 Den sin frow nie btriegen wolt Eyn hübsch frow die eyn naerrin ist Ist glich eym roß dem oren gbrist Wer mit der selben eren will Der machet krummer fürchen vil 25 Eyn fromme frow soll haben gebaerd Ir ougen schlagen zuo der erd Vnd nit hoffwort mit yederman Tryben / vnd yeden gaefflen an Noch hoeren alles das man jr seitt / 30 Vil kuppler gont in schoffes kleydt Hett nit Helen vff Pariß gyfft Eyn antwürt geben jn geschrifft Vnd Dydo durch jr schwester Ann Sie werent beid on froemde mann