Doctor Brants Narrenschiff/Von Modenarren

Wer vil nüw fünd macht durch die land
Der gibt vil a^ergernyß vnd schand
Vnd halt den narren by der hand

Von nüwen funden.

Das ettwan was eyn schantlich ding
Das wygt man yetz schlecht vnd gering
Eyn ere was ettwan tragen bert
Jetz hand die wybschen mann gelert

Vnd schmyeren sich mit affen schmaltz

Vnd du^ont entblo^essen jren halß
Vil ring vnd grosse ketten dran
Als ob sie vor sant Lienhart stan
Mit schwebel / hartz / büffen das har

Dar jn schlecht man eyer klar

Das es jm schu^esselkorb werd kruß
Der henckt den kopff zu^om fenster vß
Der bleicht es an der sunn vnd für
Dar vnder werden lüse nit dür

Die tru^egen yetz wol jn der welt

Das du^ot all kleyder sindt vol felt
Ro^eck / ma^entel / hembder / vnd brustdu^och
Pantoffel / styfel / hosen / schu^och
Wild kappen / ma^entel / vmblouff dran

Der jüdisch sytt wil gantz vff stan

Dann eyn fund kum dem andern wicht
Das zeygt das vnser gmu^et ist licht
Vnd wanckelbar jn alle schand
Vil nüwerung ist jn allem land

Kurtz schentlich vnd beschrotten ro^eck

Das eyner kum den nabel bo^eck
Phfuch schand der tütschen nacion
Das die natur verdeckt wil han
Das man das blo^eßt / vnd sehen lat

Dar vmb es leyder übel gat

Vnd würt bald han eyn bo^esern stand
We dem der vrsach gibt zu^o schand
We dem ouch der solch schand nit strofft
Im würt zu^o lon das er nit hofft