Doctor Brants Narrenschiff/Von der Narren Gewalt

Narrheyt hatt eyn groß gezelt
By jr la^egert die gantz welt
Vor vß / was gewalt hatt / vnd vil gelt

von den gwalt der narren

Es ist nott / das vil narren synt
Dann vil synt an jn selbs erblynt
Die mitt gwalt went witzig syn
Do yederman sicht vnd ist schyn

Ir narrheyt / doch nyemant getar

Zu^o jnn sprechen / was tu^ostu narr /
Vnd wenn sie gro^esser wyßheyt pflegen
So ist es vast von der go^euch wegen
Vnd wann sie nyemans loben wil

So loben sie sich dick vnd vil

So doch der wiß man gibt vrkund
Das / lob stinck / vß eym eignen mundt
Wer jnn sich selbst vertruwen setz
Der ist eyn narr vnd dorecht go^etz

Wer aber wißlich wandlen ist

Der würt gelobt zu^o aller frist
Die erd ist sellig / die do hat
Eyn herren / der jnn wißheyt stat
Des rott ouch ysßt zu^o rechter zyt

Vnd su^ochen nit wollust / vnd gydt

We we dem ertrich / das do hat
Eyn herren / der jnn kyntheyt gat
Des fürsten essen morgens fru^eg
Vnd achten nit was wißheyt tu^eg /

Eyn arm kyndt / das doch wißheyt hat

Ist besser vil jn synem stadt
Dann eyn künig / eyn alter tor
Der nit fürsicht die künfftig jor /
We den gerechten vber we

Wan narren stigen jn die ho^eh

Aber wann narren vnder gondt
Gar wol die gerechten dann gestondt
Das ist dem gantzen land eyn ere
Wann vß dem gerechten würt eyn here

Aber doch / wann eyn narr regiert

So werden vil mit jm verfu^ert /
Der du^ot nit recht / wer an gericht
Durch früntschafft eym jns anttlit sicht
Der selb ouch vmb eyn bissen brot

Worheyt vnd gerechtikeyt verlot /

Recht vrteyln / stat eym wisen wol
Eyn richter nyemans kennen sol
Ratt vnd gericht / hat keynen fründt
Susannen richter noch vil syndt

Die mu^otwill triben / vnd gewalt

Gerechtikeyt die ist vast kalt
Die schwert die sint verrostet beyd
Vnd wellen nym recht vß der scheyd
Noch schnyden me / do es ist nott

Gerechtikeyt ist blyndt vnd dott

All ding dem geltt sint vnderthon /
Jugurtha do er schyed von Rom
Do sprach er / o du veyle statt
Wie werstu so bald schoch vnd matt

Wann du eyn kouffman hettst alleyn

Man fyndt der stett noch me dann eyn
Do man hantschmierung gern vff nymbt
Vnd dar durch du^ot vil das nit zymbt
Myet / früntschafft / all worheyt vmb kert

Als Moysen syn schwa^eher lert

Pfenning / nyd / früntschafft / gwalt vnd gunst
Zerbrechen yetz / recht / brieff / vnd kunst /
Die fürsten worent ettwan wiß /
Hattent altt ra^et / gelert / vnd gryß

Do stund es wol jn allem land

Do wart gestroffet sünd vnd schand
Vnd was gu^ot fryd jnn aller welt
Jetz hatt narrheyt all jr gezelt
Geschlagen vff / vnd lyt zu^o wer

Sie zwingt die fürsten / vnd jr her

Das sie so^ent wißheyt / kunst / verlan
Alleyn eygen nutz sehen an
Vnd wo^elen jnn ein kyndschen ratt
Dar vmb es leyder vbel gatt

Vnd hat kunfftig noch bo^eser gestalt

Groß narrheyt ist by grossem gewalt
Gott ließ / das mancher fürst regiert
Langzyt / wann er nit würd verfu^ert
Vnd vnmilt wurd / vnd vngerecht

Durch anreytz valscher ra^ett vnd knecht

Die na^emen gaben / schenck vnd myet
Vor den ein fürst sich billich hu^et
Wer gaben nimbt / der ist nit fry
Schenck nemen / macht verretery

Als von Ayoth geschach Eglon /

Vnd Dalida verryet Samson /
Andronicus nam gulden vaß
Des wart gedo^etet Onyas /
Ouch Benadab der künig brach

Sin büntniß / do er gaben sach /

Tryphon do er betriegen wolt
Das Jonathas jm glouben solt
Do schanckt er gaben jm vorhyn
Do mit er mo^echt beschissen jn