Doctor Brants Narrenschiff/Von geschwätzigen Narren

Wer syn zung vnd syn mundt behu^et
Der schirmt vor angst / sel / vnd gemu^et
Eyn specht syn jung mit gschrey verriet

Von vil schwetzen

Der ist eyn narr der anden wil
Dar zu^o sunst yederman schwigt still
Vnd wil on not verdienen haß
So er mit ere mo^echt schwigen baß

Wer reden wil / so er nit sol

Der fu^egt jn narren orden wol
Wer antwürt / ee man frogt jn
Der zeigt sich selbs eyn narren syn
Mancher hat von sym reden freid

Dem doch dar vß kumbt schad vnd leid

Mancher verlaßt sich vff syn schwa^etzen
Das er eyn nuß red von eynr ha^etzen
Des wort die sindt so starck vnd dieff
Das er eyn loch redt jn eyn brieff

Vnd riechtet zu^o eyn geschwetz gar licht

Aber wenn er kumbt zu^o der bicht
Do es jm gilt ewig lon
So will die zung von stat nit gan /
Es sindt vil Nabal noch vff erd

Die schwa^etzen me dann jn gu^ot werd /

Mancher für witzig würd geschetzt
Wann er sich nit hett selbst verschwa^etzt
Eyn spa^echt verradt mit syner zung
Das man syn na^ost findt / vnd die jung

Mit schwigen man verantwurt vil

Schaden entpfoht / wer schwa^etzen wil /
Es ist die zung eyn kleyn gelid
Bringt doch vil vnru^o / vnd vnfrid
Befleckt gar dick den gantzen lib

Vnd macht vil zancken / krieg / vnd kyb

Vnd ist eyn wunder groß jn mir
Das man macht zam eyn yedes thier
Wie hert / wie wild / wie grym das ist /
Keyn mensch synr zungen meister ist

Zung ist eyn vngerüwigs gu^ot

Vil schaden sie dem menschen du^ot /
Durch sie / so du^ont wir schelten gott
Den na^ehsten gschma^ehen wir mit spot
Mit flu^ochen / noch red / vnd veracht /

Den gott noch sym bild hat gemacht /

Durch sie / verroten wir vil lüt
Durch sie / blibt vnuerschwigen nüt /
Mancher durch geschwa^etz sich so begot
Er darff nit kouffen wyn noch brot

Die zung die brucht man jn das recht

Durch sie würt krum das vor was schlecht
Durch sie / verlürt manch armer man
Syn sach / das er mu^oß bettlen gan /
Schwa^etzer ist nüt zu^o reden vil

Er kitzt sich / vnd lacht wenn er wil

Vnd redt keym menschen üt gu^ots noch
Er sy joch nider oder hoch /
Welch machen groß geschrey vnd braht
Die lobt man yetz / vnd hat jr acht

Vor vß / welch ko^estlich jnhar gant

Vil grosser ro^eck vnd ring an hant
Die fu^egen yetz woll für die lüt
Eyns dünnen rock acht man yetz nüt /
Wer noch vff erd Demosthenes

Tullius oder Eschynes

Man geb jn durch jr wißheyt nüt
Wann sie nit künden bschissen lüt
Vnd reden vil geblu^emter wort
Vnd was eyn yeder narr gern hort /

Wer vil redt / der redt dick zu^o vil

Vnd mu^oß ouch schiessen zu^o dem zil
Werffen den schlegel verr vnd witt
Vnd rinckengyessen zu^o widerstrit /
Vil schwa^etzen ist selten on sünd

Wer vil lügt / der ist nyemans fründ

Wer herren vbel redet üt
Das blibt verschwigen nit lang zit
Ob es joch ver gescha^eh von jm
Die vogel tragen vß din stym

Vnd nymbt die leng nit wol gu^ot end

Dann herren hand gar lange hend /
Wer vber sich vil howen wil
Dem vallen spa^en jnn die ougen vil
Vnd wer syn mundt jnn hymel setzt

Der würt offt mit sym schad geletzt /

Eyn narr syn geist eyns mols vff schütt
Der wiß schwigt vnd beit künfftig zytt
Vß vnnütz red / keyn nutz entspringt
Schwa^etzen me schad dan frommen bringtt

Dar vmb vil wa^eger ist geschwygen

Dann schwa^etzen reden oder schryen
Sotades durch wenig wortt
Gekerckert wart als vmb eyn mortt
Er sprach alleyn Theocrytus

Das einoygig wer Antigonus /

Vnd starb drumb jn sym eygnem huß
Als Demosthenes vnd Tullius
Schwigen ist loblich / recht / vnd gu^ot
Besser ist red / der jm recht du^ot