Doctor Brants Narrenschiff/Von unberathnen Narren

Wer nit kan sprechen ja vnd neyn
Vnd pflegen rott vmb groß vnd kleyn
Der hab den schaden jm alleyn

Nit volgen guttem ratt

Der ist eyn narr der wiß will syn
Vnd weder glympff / noch moß du^ot schyn
Vnd wan er wißheyt pflegen will
So ist eyn gouch syn fa^ederspyll

Vil sint von worten wyse vnd klu^og

Die ziehen doch den narren pflu^og
Das schafft das sye vff jr wyßheyt
Verlossen sich vnd bschydikeyt
Vnd achten vff keyn fro^emden ratt

Biß jn vnglück zu^o handen gat

Syn su^on Thobias all zyt lert
Das er an wisen ratt sich kert /
Dar vmb das nit folgt gu^ottem rott
Vnd den veracht die hußfrow Loth

Wart sie geplagt von gott dar von

Vnd mu^est do zu^o eym zeichen ston /
Do Roboam nit volgen wolt
Den altten wisen / als er solt
Vnd volgt den narren / do verlor

Er zehen gschlecht / vnd bleib eyn dor /

Het Nabuchodonosor Daniel ghort
Er wer nit jnn eyn thier verkert
Machabeus der sterckest man
Der vil groß tugent hat gethan

Hett er gefolget Jorams rott

Er wer nit so erschlagen dot /
Wer allzyt volgt sym eygnen houbt
Vnd gu^otem rott nit volgt vnd gloubt
Der acht vff glück vnd heyl gantz nüt

Vnd will verderben ee dann zytt

Eyn fründes ratt nyeman veracht
Wo vil ra^et sint / ist glück vnd macht
Achitofel sich selber dot
Das Saul nitt volget synem rott