Doctor Brants Narrenschiff/Von unnützem Studieren

Wer nit die recht kunst studiert
Der selb jm wol die schellen ru^ert
Vnd würt am narren seyl gefu^ert

Der studentten ich ouch nit fyr
Sie hant die kappen vor zu^o stür
Wann sie alleyn die streiffen an
Der zippfel mag wol naher gan

Dann so sie soltten vast studieren

So gont sie lieber bu^obelieren
Die jugent acht all kunst gar kleyn
Sie lerent lieber yetz alleyn
Was vnnütz vnd nit fruchtbar ist

Das selb den meisteren ouch gebrist

Das sie der rechten kunst nit achten
Vnnütz geschwa^etz alleyn betrachten
Ob es well tag syn / oder nacht
Ob hab eyn mensch / eyn esel gemacht

Ob Sortes oder Plato louff /

Solch ler / ist yetz der schu^oler kouff /
Sindt das nit narren vnd gantz dumb
Die tag vnd nacht gant do mit vmb
Vnd krützigen sich vnd ander lüt

Keyn bessere kunst achten sie nüt

Dar vmb Origines / von jnn
Spricht / das es sint die fro^esch gesyn
Vnd die hundes mucken die do hant
Gedurechtet Egypten landt /

Do mit so gat die jugent hyen

So sint wir zu^o Lyps / Erfordt / Wyen
Zu^o Heidelberg / Mentz / Basel / gstanden
Kumen zu^o letst doch heym mit schanden
Das gelt das ist verzeret do

Der truckery sint wir dann fro

Vnd das man lert vff tragen wyn
Dar vß würt dann eyn henselyn
So ist das gelt geleit wol an
Studenten kapp will schellen han