HexenVerbrennung Bistum Würtzburg Bamberg (1627)

[1]

[2]

HOer O mein Christ besunder / die schröckliche Geschicht. / also mit grossem Wunder / davon ich euch bericht / so gar ein jämmerliche That / was sie da hat begeben / Zu Würtzburg inn der Statt.

 2. Alda thut man verbrennen / Vil Hexen Mann vnd Weib / was sie schröcklichs bekennen / Davon ich jetzund schreib / das ist traurig zuhören an / wie nun derlaidig Teuffel / die Leuth verführen kan.

 3. Mancher Vatter vnd Mutter / wußt nichts von seinem Kind / manche Schwester vnd Bruder / von andern wurd verbrennt / ja mannicher Mann von seinem Weib / der Teuffel thet sie blinden / An Seel vnnd auch am Leib.

 4. Ein Kramer wurdt verbrennet / zu Würtzburg inn der Statt / Der hat gantz frey bekennet / daß er vom Teuffel hat / all Monat zweintzig Thaler gut / Zwölff Jahr jhr Haubtman gwesen / gar fleissig dienen thut.

 5. Ein reiche Fraw darneben / mit jhm verbrennet war / die thet gäntzlich fürgeben / Vnd saget also klar / Sie hett drey hundert Fuder Wein / Aber das Hexen Leben / thet jhr vil lieber seyn.

 6. Wie ein Metzger vnd Gerber / die auch haben bekennt / Ein Beck vnd auch Schwartzferber / Als man sie hat verbrennt / Sprachen es müßten sie tawren doch / wann sies nit hetten gelernet / sie woltens lernen noch.

 7. Zu Bamberg auch deßgleiche / verbrennt man alle Tag / Ja mehrer theil die Reiche / sing ich mit wahrer sag / Ein Schulmeister war da verbrinnt / drey Jahr das Hexen Leben / thet lehrnen seine Kind.

 8. Dann der bekennt mit namen / das ist ein schröcklich Werck / Wie sie seyn gweßt beysammen / Auff dem Fraw Venus Berg / Eben an der Waldburgen Nacht / so vil inn der Welt waren / hond sie zusammen bracht.

 9. Ein Fahnen sie da führen / darinn der Teuffel war / gemahlet vnd gezieret / die Bildnuß Christi klar / war vnder sein Füß gethon / darmiter sie beredet / Gott soll kein Gwalt mehr hon.

 10. Deßwegen sie sehr preysen / jhren GOtt Lucifer / Ihm grosse Ehr beweisen / Den wahren GOtt vilmehr / Verfluchen sie jnnsonderheit / vnnd auff ein newes absagen / Der hochen Dreyfaltigkeit.

 11. Zum dritten mal mit Wunder / der Himmel offen war / Ein Stimm schry laut herunder / Heur / heur inn disem Jahr / muß das Geschlecht zu boden gohn / inn gantzer Welt jetzunder / sollen sie kein Frid hohn.

 12. Wie man schon thut erfaren / inn mannichem Landt vnd Statt / das man kein fleiß thut sparen / schon vil verbrennet hat / vnd greifft je länger vnd fester an / der Welt Gottloses Leben / Gott nimmer sehen kan.

 13. Der Bischoff wirdt jetzunder / verbrennen auff einmal / zu eim Beyspil vnd Wunder / ja Hundert an der Zahl / der gantzen werthen Christenheit / daß man sie soll vertreiben / dann es ist grosse Zeit.

[3]

 14. Wa mans nit will verbrennen / so geben sie sich dar / Frey öffentlich bekennen / wie kund vnnd offenbahr / man soll sie richten mit dem Schwerdt / Sie künden nicht mehr leben / vor lauter Angst auff Erd.

 15. Ein Müller vnd Beckh eben / zu Werdten inn der Statt / hond sie selber dargeben / die man verbrennet hat / Bekandten auch vor jrem Todt / vil Menschen habens verführet / Auß lauter Hungersnoth.

 16. Ein Edle Fraw deßgleiche / wie man sie hat verbrennt / dann sie war mächtig Reiche / Die schrye vor jhrem End / Mich rewt die gute Tag vnnd Stund / So wider werden haben / Die arme Bettelhund.

 17. Also habt jhr vernummen / von diser Teuffels Rott / so gar inn kurtzer Summen / Ach du mein frommer GOTT / Wer alles hie beschreiben will / Ist gar schröcklich zuhören / vnd auch zu lesen vil.

 18. O GOtt thu vns behüten / Jetzund vnd allezeit / vors Teuffels List vnd wüthen / Du hoch Dreyfaltigkeit / Mach der bösen Welt ein End / Mein Leib / mein Seel / mein Leben / nimb HERR inn deine Händ / AMEN.

ERstlich haben sie bekennt / Wann ein Hochzeiter / mit seiner Braut zur Kirchen geht / vnd mit dem lincken Fuß vor inn die Kirchen trit / so könden sie machen / das keines kein Lust mehr zum andern haben kan.

 Zum andern / Wann nun die Braut vor dem Bräutigam inn das Beth geth / so können sie dem Bräutigam sein Mannheit nemmen.

 Zum Dritten / Ein Hebamm hat bekennt / wann ein Fraw das erste Kind trag / vnd der Mann jhr die Hebamm nicht selber holl / so könne sie das Kind vmbbringen / vnd die Mutter verderben.

 Zum Vierdten / So man die Kinder vnder zwölff Wochen inn das Bad / oder Badstuben trägt / dieselbe Kinder könden sie verzaubern / daß sie weder wachßen / noch zunemmen.

 Zum Fünfften / Wann man die Stuben oder Hauß außkehr / vnnd den Vnflat hinder der Thür ligen läßt / so wollen sie denselbigen Menschen verderben. Es kan sie auch der Teuffel Leibhafftig darhindert verbergen. Auch künden sie wissen / was im gantzen Hauß geschicht.

 Zum Sechsten / Wann ein Mensch früe auffsteht / vnnd wäscht die Händ nicht / was nun derselbig Mensch angreiff den gantzen Tag / da könden sie bekommen / vnd haben macht vber alle Sach. Wer mit Viech vmbgeht / es seyen Pferdt / Kühe / Ochßen / Schwein oder Schaaff / so kan das Viech nicht gedeyen vnd zunemmen. Auch können sie die Milch / Butter / Käß vnd Schmaltz bekommen. Können auch die Kühe selber Melcken. Deßwegen sie im Franckenlandt die Milch Dieb genennt werden.

[4]

 Zum Sibenden / wann man die Füß wäscht / vnd das Wasser vber Nacht stehen laßt / so könden sie den Teuffel jren Buhlen darein baden / sonderlichen am Sambstag zu Nacht / Auch sonst vil Vnglück darmit anrichten.

 Zum Achten / Wann ein Mensch Eyr ißt / vnd würfft die Schalen inn die Schissel / vnd zertruckt sie nicht / so könden sie einen Menschen darmit verderben. Zum Neundten / wann ein Magdt oder Jungkfraw / auß dem Bad geht / vnd das Badthuch vber Nacht naß ligen laßt / so können sie demselben Menschen jhr Weibliche Blumen nemmen / vnd jhr auch nimmermehr zuhelffen sey. Zum Zehenden / Wann die Mägdtlein auff den Tantz gehen / vnnd den linckhen Schuh vor einpressen oder schnieren / so hab der Teuffel macht mit jhr zu Tantzen. Zum Eylfften / Wann man an einem Sambstag Saltz oder Eyr außleyht / so kan sie machen / daß dieselbige Nacht kein Mensch im gantzen Haus schlaffen kan / oder wol gar das Jüngst oder Eltist verderben.

 Zum Zwölfften / Noch ein andere Bekandtnuß / wie vnd durch was für List Mann vnd Weibspersohnen / hinder das Hexenwerck kommen vnd gebracht werden.

 Zum Dreyzehenden / Wann die Gesellen auf die Buhlschafft gehn / da erscheint jhn der Teuffel inn Gestallt seines Buhlen / durch die Gesellen betrogen vnnd verführt werden.

 Zum Vierzehen / Wann die Baurenknecht am Mittwochen zwischen eylff vnd zwölff Vhren / sich heimlich zu der Magdt wollen legen / So schlaffen sie beym Teuffel. Vnd also verführt werden.

 Zum Fünffzehenden / Wann die Mägdtlein inn dem Gunchelhauß oder Roggenstuben selber mit einander Tantzen / so hat der Teuffel macht vber alle die da im Hauß sein.

 Zum Sechzehenden / vnd Sibenzehenden / Bekennen das vil tausendt Mägdtlein also sind verführt worden / deßwegen die GunckelHäuser oder Roggenstuben inn der gantzen Welt solt man abschaffen.

 Also habt jhr zu einem Exempel vnnd trewhertziger Warnung / was fromme Christen seyn / gnugsamb verstanden / Alles hie zuerzehlen / wer gar schröcklich zu hören.

 Der Allmächtige GOTT vnnd Vatter / im Namen JEsu Christi / seines lieben Sohns / durch die Krafft deß H Geists / wölle vns gnädiglich behüten vnd bewahren / vor deß Teuffels Trug vnd List / vnd seim gantzen Anhang. O du H. Dreyfaltigkeit / laß dir vnser Leib vnnd Seel befohlen seyn / von nun an biß in alle ewigkeit / Amen / HErr JEsu Amen.