Lutherbibel/2. Johannes (1546)

aus Wikisource, der freien Quellensammlung

[Bearbeiten] Die II. Epistel S. Johannis.

Der Eltester. Der ausserweleten Frawen vnd jren Kindern, die ich lieb habe, in der warheit, Vnd nicht alleine ich, sondern auch alle, die die warheit erkand haben, [2]vmb der warheit willen, die in vns bleibet, vnd bey vns sein wird in ewigkeit.

[3]GNade, barmhertzigkeit, friede, von Gott dem Vater, vnd von dem HErrn Jhesu Christo, dem son des Vaters, in der warheit, vnd in der liebe, sey mit vns.

[4]Jch bin seer erfrewet, das ich funden habe vnter deinen Kindern, die in der warheit wandeln, wie denn wir ein gebot vom Vater empfangen haben. [5]Vnd nu bitte ich dich, Fraw, nicht als ein new Gebot schreibe ich dir, sondern das wir gehabt haben von anfang, das wir vns vnternander lieben. [6]Vnd das ist die Liebe, das wir wandeln nach seinem Gebot.

DAs ist das Gebot, wie jr gehoeret habt von anfang, auff das jr daselbs innen wandelt. [7]Denn viel Verfuerer sind in die welt komen, die nicht bekennen Jhesum Christ, das er in das Fleisch komen ist. Dieser ist der Verfuerer vnd der Widerchrist. [8]Sehet euch fur, das wir nicht verlieren, was wir ererbeitet haben, sondern vollen Lohn empfahen. [9]Wer vbertrit, vnd bleibet nicht in der lere Christi, Der hat keinen Gott. Wer in der lere Christi bleibet, der hat beide den Vater vnd den Son.

[10]SO jemand zu euch kompt, vnd bringet diese Lere nicht, Den nemet nicht zu hause, vnd gruesset jn auch nicht, [11]Denn wer jn gruesset, der macht sich teilhafftig seiner boesen wercke. [12]Jch hatte euch viel zu schreiben, Aber ich wolte nicht mit brieuen vnd tinten, sondern ich hoffe zu euch zu komen vnd muendlich mit euch zu reden, auff das vnser Freude volkomen sey. [13]Es gruessen dich die Kinder deiner schwester der ausserweleten, Amen.