Lutherbibel/2. Thessalonicher (1546)

aus Wikisource, der freien Quellensammlung

Inhaltsverzeichnis 1 Vorrede auff die II. Epistel S. Pauli: an die Thessalonicher. 2 Die II. Epistel S. Pauli: an die Thessalonicher. 2.1 I. 2.2 II. 2.3 III.

[Bearbeiten] Vorrede auff die II. Epistel S. Pauli: an die Thessalonicher.

In der ersten Epistel hatte S. Paulus den Thessalonichern eine Frage auffgeloeset, vom Juengsten tage, wie derselbige schnel, als ein Dieb in der nacht komen wird. Wie es nu pfleget zu komen, das jmer eine Frage die ander gebirt, aus falschem verstand, verstunden die Thessalonicher, der Juengste tag were schon furhanden. Darauff schreibet er diese Epistel, vnd verkleret sich selbs.

JM j. Cap. Troestet er sie mit der ewigen Belohnung jres glaubens vnd gedult in allerley leiden, Vnd mit der straffe jrer Verfolger, in ewiger pein.

JM ij. Leret er, wie fur dem Juengstentage, das Roemische reich zuuor mus vntergehen, vnd der Endechrist sich fur Gott auffwerffen in der Christenheit, vnd mit falschen Leren vnd Zeichen die vngleubige Welt versueren, Bis das Christus kome vnd verstoere jn durch seine herrliche Zukunfft, vnd mit einer geistlichen Predigt zuuor toedte.

JM iij. Thut er etliche ermanung, vnd sonderlich, das sie die Muessigen, die sich nicht mit eigener Hand erneeren, straffen, Vnd wo sie nicht sich bessern, meiden sollen, Welches gar hart wider den jtzigen geistlichen Stand lautet.

An die Thessalonicher 222〈 6 nu] nn Druckf. 221 10 (ebenso 13 u. 18) Am 221 –46, 34 –36] Jm 39 –46 11 strafft Druckf. 221 –2] straff seit 241〈 ||]

Die ander Epistel S. Pauli an die ThessalonicherThess II

[Bearbeiten] Die II. Epistel S. Pauli: an die Thessalonicher.

[Bearbeiten] I.

Siluanus. Timotheus. [1]Paulus vnd Siluanus vnd Thimotheus.

DEr gemeinen zu Thessalonich, in Gott vnserm Vater, vnd dem HErrn Jhesu Christo.

[2]Gnade sey mit euch vnd Friede von Gott vnserm Vater, vnd dem HERRN Jhesu Christo.

[3]Wjr sollen Gott dancken allezeit vmb euch, lieben Brueder, wie es billich ist, Denn ewer Glaube wechset seer, vnd die Liebe eines jglichen vnter euch allen nimpt zu gegen ander, [4]Also, das wir vns ewer rhuemen vnter den gemeinen Gottes, von ewer gedult, vnd glauben, in allen ewren verfolgungen vnd truebsaln, die jr duldet, [5]Welches anzeiget, das Gott recht richten wird, vnd jr wirdig werdet zum reich Gottes, vber welchem jr auch leidet. [6]Nach dem es recht ist bey Gott zu vergelten truebsal, denen die euch truebsal anlegen, [7]Euch aber die jr truebsal leidet, ruge mit vns, wenn nu der HErr Jhesus wird offenbart werden vom Himel, sampt den Engeln seiner krafft, [8]vnd mit Fewerflammen, rach zu geben vber die, so Gott nicht erkennen, vnd vber die, so nicht gehorsam sind dem Euangelio vnsers HErrn Jhesu Christi, [9]welche werden Pein leiden, das ewige verderben von dem angesichte des HERRN, vnd von seiner herrlichen Macht, [10]wenn er komen wird, das er herrlich erscheine mit seinen Heiligen, vnd wunderbar mit allen gleubigen, Denn vnser zeugnis an euch von demselbigen Tage habt jr gegleubet.

[11]VNd derhalben beten wir auch allezeit fur euch, Das vnser Gott euch wirdig mache des Beruffs, vnd erfuelle alles wolgefallen der guete, vnd das werck des glaubens in der krafft, [12]Auff das an euch gepreiset werde der name vnsers HErrn Jhesu Christi, vnd jr an jm, nach der gnade vnsers Gottes, vnd des HErrn Jhesu Christi.

[Bearbeiten] II.

Aber der zukunfft halben vnsers HErrn Jhesu Christi, vnd vnser versamlung zu jm, bitten wir euch, lieben Brueder, [2]das jr euch nicht balde bewegen lasset von ewerm sinn, noch erschrecken, weder durch den Geist, noch durch Wort, noch durch Brieue, als von vns gesand, das der tag Christi surhanden sey. [3]Lasset euch niemand verfueren in keinerley weise. Denn er kompt nicht, Es sey denn, das zuuor der Abfalle kome, vnd offenbaret werde der Mensch der suenden, vnd das Kind des verderbens, [4]Der da ist ein Widerwertiger, vnd sich vberhebet vber alles das Gott oder Gottesdienst heisset, also, das er sich setzt in den tempel Gottes, als ein Gott, vnd gibt sich fur, er sey Gott.

[5]GEdencket jr nicht dran, das ich euch solches sagte, da ich noch bey euch war? [6]Vnd was es noch auffhelt, wisset jr, das er offenbaret werde zu seiner zeit. [7]Denn es reget sich schon bereit die bosheit heimlich, On das der es jtzt auffhelt, mus hinweg gethan werden, [8]vnd als denn wird der Boshafftige offenbaret werden, Welchen der HERR vmbbringen wird mit dem Geist seines mundes, vnd wird sein Ende machen, durch die erscheinung seiner zukunfft, [9]des, welches zukunfft geschicht nach der wirckung des Satans, mit allerley luegenhafftigen Krefften vnd Zeichen vnd Wundern, [10]vnd mit allerley verfuerung zur vngerechtigkeit, vnter denen die verloren werden, dafur, das sie die liebe zur warheit nicht haben angenomen, das sie selig wuerden. [11]Darumb wird jnen Gott krefftige jrthum senden, das sie gleuben der Luegen, [12]Auff das gerichtet werden alle die der warheit nicht gleuben, sondern haben lust an der vngerechtigkeit.

[13]Wjr aber sollen Gott dancken alle zeit vmb euch, geliebte Brueder von dem HERRN, das euch Gott erwelet hat von anfang zur seligkeit, in der heiligung des geistes, vnd im glauben der warheit, [14]darein er euch beruffen hat, durch vnser Euangelium, zum herrlichen eigenthum vnsers HErrn Jhesu Christi.

[15]SO stehet nu, lieben Brueder, vnd haltet an den Satzungen, die jr geleret seid, es sey durch, vnser wort oder Epistel. [16]Er aber vnser HErr Jhesus Christus, vnd Gott, vnd vnser Vater, der vns hat geliebet, vnd gegeben einen ewigen Trost vnd eine gute Hoffnung, durch gnade, [17]der ermane ewer hertzen, vnd stercke euch in allerley lere vnd gutem werck.

[Bearbeiten] III.

Weiter, lieben Brueder, betet fur vns, das das wort des HERRN lauffe, vnd gepreiset werde, wie bey euch, [2]Vnd das wir erloeset werden von den vnartigen vnd argen Menschen. Denn der Glaube ist nicht jedermands ding, [3]Aber der HERR ist trew, der wird euch stercken vnd bewaren fur dem argen. [4]Wir versehen vns aber zu euch in dem HErrn, das jr thut vnd thun werdet, war wir euch gebieten. [5]Der HErr aber richte ewre hertzen zu der liebe Gottes, vnd zu der gedult Christi.

[6]Wjr gebieten euch aber, lieben Brueder, in dem namen vnsers HERRN Jhesu Christi, das jr euch entziehet von allem Bruder, der da vnoerdig wandelt, vnd nicht nach der satzung, die er von vns empfangen hat. [7]Denn jr wisset, wie jr vns solt nachfolgen, Denn wir sind nicht vnordig vnter euch gewesen, [8]haben auch nicht vmbsonst das Brot geno men von jemand, Sondern mit erbeit vnd muehe tag vnd nacht haben wir gewircket, das wir nicht jemand vnter euch beschwerlich weren. [9]Nicht darumb, das wir des nicht macht haben, Sondern das wir vns selbs zum Furbilde euch geben, vns nachzufolgen. [10]Vnd da wir bey euch waren, geboten wir euch solchs, das, so jemand nicht wil erbeiten, der sol auch nicht essen.

[11]DEnn wie hoeren, das etliche vnter euch wandeln vnoerdig, vnd erbeiten nichts, sondern treiben Furwitz. [12]Solchen aber gebieten wir vnd ermanen sie, durch vnsern HErrn Jhesum Christ, das sie mit stillem wesen erbeiten, vnd jr eigen Brot essen. [13]Jr aber, lieben Brueder, werdet nicht verdrossen guts zu thun. [14]So aber jemand nicht gehorsam ist vnserm wort, den zeichent an durch einen Brieff, vnd habt nichts mit jm zuschaffen, Auff das er schamrot werde, [15]Doch haltet jn nicht als einen Feind, sondern vermanet jn als einen Bruder.

[16]ER aber, der HErr des Friedes, gebe euch friede allenthalben vnd auff allerley weise. Der HErr sey mit euch allen. [17]Der grus mit meiner hand Pauli, Das ist das zeichen in allen Brieuen, also schreibe ich. [18]Die gnade vnsers HErrn Jhesu Christi sey mit euch allen, Amen.

Geschrieben von Athene.