Lutherbibel/Judas (1546)

aus Wikisource, der freien Quellensammlung

[Bearbeiten] Die Epistel S. Judas.

[1]Ivdas ein knecht Jhesu Christi, aber ein bruder Jacobi.

DEn Beruffenen, die da geheiliget sind in Gott dem Vater, vnd behalten in Jhesu Christo.

[2]GOtt gebe euch viel barmhertzigkeit vnd friede vnd liebe.

[3]Jr lieben, Nach dem ich furhatte euch zu schreiben von vnser aller Heil, hielt ichs fur noetig, euch mit schrifften zu ermanen, das jr ob dem Glauben kempffet, der ein mal den Heiligen furgegeben ist. [4]Denn es sind etliche Menschen neben ein geschliechen, von denen vorzeiten geschrieben ist, zu solcher straffe, die sind Gottlose, vnd ziehen die gnade vnsers Gottes auff mutwillen, vnd verleugnen Gott, vnd vnsern HErrn Jhesum Christ, den einigen Herrscher.

[5]Jch wil euch aber erinnern, das jr wisset auff ein mal dis, das der HERR, da er dem Volck aus Egypten halff, Zum andern mal bracht er vmb, die da nicht gleubeten. [6]Auch die Engel, die jre Fuerstenthum nicht behielten, sondern verliessen jre behausung, hat er behalten zum Gerichte des grossen tages, mit ewigen banden im finsternis. [7]Wie auch Sodoma vnd Gomorra vnd die vmbligende Stedte, die gleicher weise wie diese, ausgehuret haben, vnd nach einem ander Fleisch gegangen sind, zum Exempel gesetzt sind, vnd leiden des ewigen Fewers pein. [8]Desselbigen gleichen, sind auch diese Trewmer, die das fleisch beflecken, die Herrschafften aber verachten, vnd die Maiesteten lestern.

[9]MJchael aber der Ertzengel, da er mit dem Teufel zanckte, vnd mit jm redet vber dem leichnam Mose, thurste er das Vrteil der lesterung nicht fellen, sondern sprach, Der HErr straffe dich. [10]Diese aber lestern, da sie nichts von wissen, Was sie aber natuerlich erkennen, darinnen verderben sie, wie die vnuernuenfftigen Thier. [11]Weh jnen, denn sie gehen den weg Kain, vnd fallen in den jrthum des Balaams, vmb genies willen, vnd komen vmb in der auffrhur Kore.

[12]DJese Vnfleter brassen von ewrem Almosen on schew, weiden sich selbs, Sie sind wolcken on wasser von dem winde vmbgetrieben, kale vnfruchtbare Bewme, zwey mal erstorben, vnd ausgewurtzelt, [13]wilde wellen des Meers, die jre eigen schande ausscheumen, irrige Sterne, welchen behalten ist das Tunckel der finsternis in ewigkeit.

[14]Es hat aber auch von solchen geweissaget Enoch der siebende von Adam, vnd gesprochen, Sihe, der HERR kompt mit viel tausent Heiligen, [15]gerichte zu halten vber alle, vnd zu straffen alle jre Gottlosen, vmb alle werck jres Gottlosen wandels, da mit sie gottlos gewesen sind, vnd vmb alle das harte, das die gottlosen Suender wider jn geredt haben. [16]Diese murmeln, vnd klagen jmerdar, die nach jren Luesten wandeln, vnd jr mund redet stoltze wort, vnd achten das ansehen der Person vmbs nutz willen.

[17]Jr aber, meine Lieben, erinnert euch der wort, die zuuor gesagt sind von den Aposteln vnsers HErrn Jhesu Christi, [18]da sie euch sageten, Das zu der letzten zeit, werden Spoetter sein, die nach jren Luesten des gottlosen wesens wandeln. [19]Diese sind die da Rotten machen, fleischliche, die da keinen Geist haben.

[20]JR aber, meine Lieben, erbawet euch auff ewren allerheiligsten glauben, durch den heiligen Geist, vnd betet, [21]vnd behaltet euch in der liebe Gottes, Vnd wartet auff die barmhertzigkeit vnsers HErrn Jhesu Christi, zum ewigen Leben. [22]Vnd haltet diesen vnterscheid, das jr euch etlicher erbarmet, [23]etliche aber mit furcht selig machet, vnd ruecket sie aus dem Fewr, Vnd hasset den befleckten Rock des fleisches.

[24]DEm aber, der euch kan behueten on feil, vnd stellen fur das Angesichte seiner herrligkeit, vnstrefflich mit freuden, [25]Dem Gott, der allein weise ist, vnserm Heiland, sey Ehre vnd Maiestet vnd Gewalt vnd Macht nu vnd zu aller ewigkeit, AMEN.