Seite:Briefwechsel Hildebrand Veckinchusen 109.jpg

Fertig. Dieser Text wurde zweimal anhand der Quelle korrekturgelesen. Die Schreibweise folgt dem Originaltext.

	Wilhelm Stieda (Hrsg.): Briefwechsel Hildebrand Veckinchusen

8½ tymmer scones werkes 27 ℔ 7 sl. 6 gr. Item so es gheworden van 7 quartytr 2 timmer lusches werkes 17 ℔ 2 sl. 3 gr. Hir af sal gan to unghelde 5 sl., aldus so es dey summe van wasse unde werke tohope blyvendes 126 ℔ 16 sl. 4 gr. Dyt gud stont altomale 398 marc 16 ore, aldus so komet op elk 4 marc 1 ℔ 5 sl. gr. Aldus so bort vor dey 364 marc 8 ore Ryghes, aldus so komet hirvorn tohope 198 ℔ 11 sl. 4 gr. Aldus solde Syvert to boren vor 1000 lasten 6 timmer 15 lasten und 35 wynmereken 7 ℔ 5 sl. Item so es nicht mer worden van den wasse unde werke afrekent dat unghelt dan 116 ℔ 4 sl. 6 gr. Aldus hebbe ick dat screven in myn poper.

Mynen denst thovoren ghescreven an mynen leyven oem Hyldebrand Vockynchusen. Wetet dat ik van juwer wegen hebbe entfangen 56 Nyedernsche lakene, de ju und juwen broder Zyverde tho beho^erden. Desse laken hebbe ik vorkoft also ik ju ok wol er ghescreven hebbe, ik gaf islych laken umme 7 marc Ryg. myn 8. Item noch entfangen 3 ghesnedene Popersche laken, de gaf ik vo^er 10½ marc Ryg. Item noch entfangen 2 stuven wandes, hyr es vor ghekomen 5 marc Ryg., summa in al, dat my gheworden es vo^er desse vo^erghescreven laken also 398 marc Ryg. und 16 ore.

Item so sende ik ju in schypher Reyneke Werleman alse 8 stro wasses, hyr es de vracht unde wynnegheld van betalet. Item so sende ik ju noch in schypher Hermen Schoff 5 stro wasses, aldus ghemerket, hyr hebbe ik ok de hele vracht und wynnegheld van betalet. In dessen 13 stro syet 18 bodem unde wegen thosamen 12 schyppund myn 4 lyspund. Item so sal ju Kort Swarte noch antworden 1 kleynen bodem, dat es de neghenteynde bodem und es myd den anderen ghewogen, dat schyppund stet 20 marc Ryg. und 1 ferd., summa van dessen wasse 239 marc Ryg. Item so hebbe ik vor dyt was utegheven de hele vracht und wynnegheld und vo^ert ander ungheld byt in dat schyp 7 marc Ryg.

Item so sende ik ju noch in schyppher Herman Schoff 1 tunne werx aldus, hyr es interste ynne vor den rechten bodem 2000 myn 1 quartyr lusches werx; item noch 2000 8½ tymmer scones werx, dat 1000 stet 41 marc Ryg. und dat lusche werk stet 30½ marc, summa van dessen werke 150 marc Ryg. myn 3 ferd. Item so stet de tunne 18 ore.

Summa in al, dat ik ju hebbe ghesand in dessen twen schepen an wasse und an werke 395½ marck Ryg. und 6 ore, aldus so enbreket ju noch an desser vorghescreven rekenschop also 11 ferd. myn 2 ore, da^ermede alle dynck slycht.

Item Hyldebrand, oem, hedde ik hyr bet by ko^end hebben ghedan, dat hedde ik ghern gheda^en unde allend, wes ik hyr by hebbe gheda^en, dat es in dat beste gheschen. God de gheve dat alle dynck to den besten mo^ete vallen. Nycht mer op desse tyd dan God, de sy med ju unde ghebedet over my. Ghescreven tho Revel 3 weken na paschen 1413.

Hans Ho^enstede.

Empfohlene Zitierweise:
: Briefwechsel Hildebrand Veckinchusen. Leipzig: S. Hirzel, 1921, Seite 38. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_109.jpg&oldid=- (Version vom 31.7.2018)