|
Wilhelm Stieda (Hrsg.): Briefwechsel Hildebrand Veckinchusen |
|
|
haspen. Ik hope to Gode, dat de vrowen hir nesten umer mer syden kopen solen. Ik en wet hir nu anders neine syde to kope dan de wy hebben; besunder Hartwych Kopmans vormunders hebben noch wol en 60 ℔ unde dan de Hans Bilevelt van my nu kofft hevet. Hildebrant, ik wel des besten ramen, so ik best kan. Item Hans Stenwech unde ik hebben noch dallink 2 schippunt unde 7 lispunt wasses ghekofft, dat schippunt vor 18 mark, to betalene op vastelavent. Wo vele wasses dat wy alrede to Hamborge hebben, dat hebbe ik ju alrede ghescreven. Ok hebbe wy hir gekofft, Merten unde ik, 4500 3 bote schons werkes, dat is to unser behoff halff unde Merten halff, dat 1000 vor 18 mark 4 sl. Item, Hildebrant, na deme alse my dunket, so en wel Peter Karbou nicht bekennen, dat he enich ghelt off gut hebbe. Et was ghedeghedingget, dat he der selscop geven solde by 9000 mark an ghelde unde an gude; nu, do he dat ghelt unde gut overwizen unde vorwissen solde, do enkunde he nicht mer dan by 6000 mark tosamen brenghen. Dit screff my Syvert. Wo dat et nu vortghan wil, des en wet ik nicht. Anders nicht dan blivet ghesunt. Ghescreven 3 dage na sunte Andreasdage, anno 13.
Item, Hildebrant, ik denke juwen terlink mit den Warstenschen to Prutzen wart to sendene hir nesten alzet en luttik wort ankomet na winachten. Item ik en vorneme noch nicht van juwen Tomaschen laken. Ik mach hir gude neringe van Tomaschen laken hebben ume 15 mark, to betalene op paschen. Hirume, Hildebrant, ik enwet nein profyt an den Tomaschen laken. Item, Hildebrant, ik hope, dat gy noch ter hast nein payement op my en kopen, wante ik hebbe umer (!) nu gekofft by 9½ schippunt wasses, dar uns de helffte van tohoret unde des gheliken de helffte van 4500 3 bote schons werkes. Hildebrant, dar is werk unde was ghekomen in Prutzen, dat hir wesen sal. Hedde dat hir gekomen, ik wolde unse profiit wol bet ghedan hebben, dan ik nu ghedan hebbe, wante seker, Hildebrant iz et, dat gy dat payement overkopen solen to 6½ mark, dar gy de Tomasche laken mede betalen solen, so ensole wy an den 3 terlingen nicht 25 mark Lub. winnen. Nochtant so rekene ik elk laken by 15 mark Lub. dat dunket my cleine bate wesen dar men also vele eventurs van stan mot. Hildebrant, hir nicht mer van, men ramet des besten, desgheliken wel ik ok don etc.
96. Bruchstück aus einem Briefe Hildebrand Veckinchusens datiert Brügge 1414, Jan. 2.
- Rev. St.-A. Konzept von H. Veckinchusen’s Hand.
Int jar 1412, 22 in desember, do hadde ic hir int lant van der selschap weghen ton ersten 2 fate einghevers gronen, dar mochte inne sin by den 385 punt, dat punt was gherekent op dey tyt, dat punt 16 gr.; hirop komen to unghelde 17 sl. 8 gr. Aldus so was dey summe darvan blyvendes 24 ℔
: Briefwechsel Hildebrand Veckinchusen. Leipzig: S. Hirzel, 1921, Seite 43. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_114.jpg&oldid=- (Version vom 31.7.2018)
