|
Wilhelm Stieda (Hrsg.): Briefwechsel Hildebrand Veckinchusen |
|
|
hebbe. Ik en hebbe de 20 ℔ grote noch nicht betalt. Dat komet dar by to, dat ik et van hir nicht senden en kan. Ik hebbe Hinrik Salhorne screven, dat he et daropneme, ik welt hir betalen. Ik ride, off Got wel, morghen off en aschedag to Luneborge wart unde ik hebbet bestellet, dat dar ghelt betalt sal werden. Hildebrant, ik sy van de Venedieschen selscop wegen tachter by 200 mark Lub. van gelende ghelde. Ik behoffte wol, dat ik dat ghelt hedde. Item ik en hebbe van der syden nicht mer vorkofft, dan alse ik ju screven hebbe. Item juwe Tomasche laken sin ok noch unvorkofft. Hildebrant, hir enhevet mit all neine lozinge van wande ghewest, dat komet dar by to, dat dat water al tovroren wesen hefft, mer ik hope, dat hir nu kort handelingge werden sole.
Item, Hildebrant, ik scheppede juwen terling mit den Warstenschen laken ghysteren to Prutzen wart in schepper Ludeken Mak. Got geve dat he mit leve overkome.
Item, Hildebrant, ik hebbe (da)t scharlaken alrede in ene tunne ghedan unde hebbet bevolen, dat ment senden sole to Hamborge wart. Ik hebbe dar ok 3 quartir min 1 bote rodes werkes inne, de quemen my ut (P)rutzen; nu en is de tunne noch nicht vul, also dat ik dar noch en luttik mer indon mot. Hildebrant, is des to done, so wel ik dat wol gut maken, dat et by my nicht gheschein en is. Ik wolde, weret Godes wille, dat gy de Ypersche ny kofft en hedden.
Item, Hildebrant, ik en hebbe noch nicht vele gheldes entfangen van enem terlinge Tomaschen laken. De lude en kunnen to neine ghelde raken. Ik en wet wo don ume ghelt. Item, Hildebrant, de vrowen hebben noch vuste zyden, darume so mot ik vorbeden. Ik en wel nicht gerne to done hebben mit den dar ik my nicht ane vorwart en wet. Hirmede blyff ghesunt. Ghescreven des vridages vor vastelavende anno 14.
Item, Hildebrant, hir en is noch neine tidinge komen ut Lyfflande alse van der kopenscop.
98. Elisabeth Veckinchusen in Köln an Hildebrand Veckinchusen in Brügge. – 1414 Juli 16.
- Rev. St.-A. Orig. Adr.: An den erbaren man Hyldebrant Veckinchusen to Brugge littera detur.
Vruntliche groysse vurscreven wetet leve bole Hylbrant, dat ic de 11 gulden und 7 placken van Hammaker intfangen hebbe. Item so wetet dat Syvert is to Spyr, man seycht hyr de koninck van Ungern sy dar oc. As gy schriven dat Sivert neyn gelt up ju kopen sal, des wetet dat Syvert hyr hatte upgenomen 100 gulden van Symon deym Lumbarde, er he van hyr toch, darum dot wol ind maket, dat dat gelt dar to dancke wyrt betaylt, wente wy quemen dar anders in ungeloven; und oc so wetet dat is Syvert nicht bet in konde, wente wy syn hyr alto vele geltz schuldych. Item so schryve gy oc dar inne van veyl anderen puonten dar in kan ic juo
: Briefwechsel Hildebrand Veckinchusen. Leipzig: S. Hirzel, 1921, Seite 45. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_116.jpg&oldid=- (Version vom 17.8.2017)
