so lang vnd außgedehnet / so außgesogen vnd hager / so verbeint vnd entblösster Knochen / so gar auß dermassen schwindsüchtig / daß gnugsam an seiner Gestalt abzusehen vnd zu ermessen war / mit was reiffen Bedencken vnd Verstande / auch wie gar billich vnd recht / jhm dieser Nahme war gegeben worden. Nahe bey dem Pferd stund Santscho Panssa oder Dickbauch / seinen Esel mit dem Zaum an der Hand haltend. Vnter jhm war ein gemachter Zettel / drauff stunde: Santscho Sancas oder Breitfuß / darumb daß er vielleicht / wie auß der Abbildung zu sehn war / einen grossen dicken Bauch hatte / fein kurtz beysammen / vnd von der Natur mit breiten Latschen vnd dicken Beinen begabt ware. Vnd darumb wurd jhm sonder zweiffel der Zunahme Pantschmann vnnd Breitfuß gegeben / mit welchen beyden Nahmen er denn zu mehrern mahlen von dem Geschichtschreiber genennet wird. Es befunden sich hierbey noch etliche geringe Auffmerckungen vnd Vmbstände: So aber nicht sonderbarer Wichtigkeit seynd / vnnd der Glaubwürdigkeit der Geschicht / weder ichtwas geben noch nehmen / so warhafftig sie auch seyn mögen.
Daferrn ja wider die Warheit dieser Geschicht einiger Einwurff könte beygebracht werden / würde es kein ander seyn / als daß der Meister vnd Beschreiber deroselben ein Araber sey: Welcher Landsart Eigenschafft ist / daß sie gern pflegen neben der Warheit her zu spatzieren. Wiewol im Widerspiel[1] / vnd weil sie vns so gar feind vnd gramm[2] seyn / vielmehr zuerachten were / daß er ehe zu wenig als zuviel hiervon wurde geschrieben vnd berichtet haben. Vnd eben also laß ich mich auch bedüncken / daß so offt er zu billichem Lob vnd Preisung dieses so tapffern Ritters / hette die Feder ansetzen können vnd sollen / er mit fleiß solches mit stillschweigen vbergangen habe.
Miguel de Cervantes: Erster Theil Der abenthewrlichen Geschichte des scharpffsinnigen Lehns- vnd Rittersassen / Juncker Harnisches auß Fleckenland / Auß dem Spanischen ins Hochteutsche vbersetzt Durch Pahsch Basteln von der Sohle. Frankfurt 1648, Seite 108. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Don_Kichote_de_la_Mantzscha_108.jpg&oldid=- (Version vom 18.8.2016)
