Topographia Bavariae (Bayern): Liechtenberg

[43] Liechtenberg / Ein Schloß jenseit deß Lechs gelegen. Anno 1648. haben die verbundene Frantzosen vnd Schweden zu Scheiringen (weyland ein ansehenlich Dorff in Bäyern / daß die Schweden im Jahr 1633. gantz außgeraubet / vnnd die zwo Kirchen / mit den verschlossenen Persohnen / so dahin geflohen waren / verbrandt; wie in dem Augspurgischen oben angezogenem Summarischen Verlauffs Begriff stehet) sich in Schlacht Ordnung gestellt / vnnd den dreyssigsten Septembris Alten Calenders über eine Lauff-Brücke / zwischen den beyden Schlössern Liechtenberg / vnd Haldenberg / ihren Plunder durch den Lech gehen lassen; die Armee aber ist noch biß gegen Abend / hinder dem Wäldlein / bey dem gedachten Schloß Liechtenberg / in der Schlachtordnung haltend / geblieben; hernach auch über den Lech / in Schwaben / gangen / vnnd selbigen Tags gar spat / zu Schwäbisch München zu logiren kommen / so eine kleine Meil von besagtem Scheiringen gelegen.