Topographia Braunschweig Lüneburg: Vßler

[T115] [199] Vßler. Ist ein Fürstl. Calenbergisch Ampt vnd Statt / im Sollinger Wald / drey Meil von der Statt Göttingen / wann man von dar ab nacher Huxar reisen will. Diejenige / so das vhralte Geschlecht der von Vßler von einem Edlen Römer Uslario de Rodo Campo deriviren / geben für / es sey von selbigem annoch in der Heydenschafft erbawet. Hertzog Erich der Jünger hat allda ein prächtig Fürstl. Hauß bawen lassen / vnd von dem schönen Thal / darin es gelegen / Frewdenthal genennet / wie annoch auß den hinterbliebenen ruderibus, weil es in anno 1612. gäntzlich in Fewersbrunst vffgangen / zu ersehen. Die Statt Vßler hat bey diesen Kriegesläufften / vnd noch vorhero / grossen Brandschaden erlitten / nehret sich von Handwercken / Ackerbaw / vnd dem brawen.