Topographia Sueviae (Schwaben): Allerheim

EIN Gräflich Oettingisch Dorff / zwischen Nördlingen / vnd Wemmdingen / anderthalb Stundt vom Schloß Henneberg / im Rieß / sambt einer Kirchen vnnd zweyen Adelichen von Stein erbawten Häusern / vnd einem Schlößlein / auff der lincken Seiten / gleiches Nahmens gelegen: Allda den 24. Julij / alten / oder den 3. Augusti / N. Ca. Anno 1645. das blutige Treffen / zwischen den Frantzösischen vnd Chur-Bäyrischen Völckern / vorgegangen / in welchem von 7. in 8. tausendt Mann todt blieben seyn sollen; aber mehr von Frantzosen / deren Fußvolck / sonderlich grob eingebüßt / vnd dessen vber die dreytausend allhie begraben worden: Wie von einem glaubwürdigen Orth man dessen gewissen Bericht zu haben vermeynt: Wiewol Georgius Engelsüß / in seinem Weymarischen Feldzug / sagt / daß der Käyser: vnd Bäyrischen 3. in 4000. geblieben / vnd 1500. in 2000. gefangen worden: gleichwol von den Frantzzösich vnd Weymarischen / auch auff die dreytausendt vmbkommen seyn: Welche aber endlich / nach einem so blutigen Kampff / das Feld erhalten / vnd hernach viel ihrer Verwundten ins Closter Zimmern führen lassen / auch obgedachtes Schloss Henneberg eingenommen haben. Auff ChurBäyrischer Seiten / ist der General FeldtMarschall Mercy todt blieben / vnd der Graff von Gleen gefangen worden: auch besagtes Dorff darüber in den Brandt gerathen.