| [31]
Beilstein.
Dieses Stättlein ligt in der Gegend vmb Botwar / in einem schönen Wiesenthal / an einem Berg / mit Weingärten hüpsch vmbgeben Auf dem Berg stehen dz Schloß / die Kirchen vnd Pfarrhauß. Solle Anno 1274. seyn vmbmawret worden. Auff besagtem Berg-Schloß / hat Herr Wolff von Wimmerstein / der gleissend Wolff genannt / etwan gewohnet / welcher mit Graf Eberharden von Würtenberg Feindschafft gehabt / biß endlich die Sach vertragen worden / vnnd gedachter Wolff / als der letzte seines Geschlechts / dise seine Herrschafft Beylstein / dem Grafen von Würtenberg / mit sampt kleinen Botwar / vermacht hat / so Anno 1338. geschehen seyn solle. Vnd ist jetzt noch ein Ampt. Es führet dieses Stättlein in seinem Wappen ein Müllers Beyhel / vnnd Mühlrad / vnd gehören dahin folgende Flecken / als Oberstenfeld / Sanct Petersberg / Grünaw / Burstell / HohenRiedern / vnnd Wintzelhausen. Es schreibet Crusius Paralip. Annal. Suev. fol. 41 daß zwischen Beylstein / vnnd dem Kloster Oberstenfeld / im Wiesenthal / sich die Storcken jährlich Hauffenweiß samblen / folgends von dannen hinweg fliehen / sich auf die Schiff setzen / vnd also vber Meer kommen.
|
