Topographia Sueviae (Schwaben): Weinsperg

[215]

Ligt ausser deß Craichgäws / gegen der Pfalz zu / von welcher sie Anno 1504. in dem Bäyer-Pfältzischen Krieg / sampt dem Kloster Maulbrunn / vnnd dem Stättlein Meckmyl / an das Hauß Würtenberg kommen; der Zeit aber Gräflich Trautmanstorffisch ist. Ligt in einem luftigen Thal / vnd führet einen Adler / sampt einem Weinstock auff der Rechten Seiten / zum Wappen. Es hat von diesem Orth ein ganzes Thal herumb den Namen / darinn es schöne Dörffer / vnd herrlichen Weinwachs hat. Hat vorhin / ehe sie an die Pfalz kommen / eygene Grafen gehabt: Vnd ist berühmbt / wegen der schönen Geschicht / so sich allhie Anno 1140. mit den Weibern zugetragen. Dann / als Käyser Conrad der Dritte / wider Hertzog Guelphen auß Bäyern / kriegte / vnd diser desselben Statt belägerte / vnnd solche dahin / daß sie sich ergeben muste / gebracht / hat er den Weibern die Gnad gethan / daß sie / was ein jede tragen konte / mit sich außtragen möchten; da dann diese Weiber / an statt anderer Sachen / ein jede ihren Mann auff die Achsel gefaßt / vnd auß der Statt getragen. Vnd hat dem Käyser diese That so wol gefallen / daß er die Männer alle auch begnadet hat. Anno 1525. haben die Bürger allhie den Bawren die Statt verrathen / vnd vbergeben / welche Bawren darauff das Schloß außgebrandt haben. Daher besagte Statt / von dem Schwäbischen Bund wider verbrandt worden; sonderlich / weil die Bawren den Graf Ludwigen von Helffenstein / vnnd viel von Adel / vor der Statt / durch die Spieß gejagt / vnnd vmgebracht haben. Johan. Trithemius in Chron. Hirsaug. & Crusius in Annalibus Suevic. Brunner. libro duodecimo Annal. Boiocorum. pagina 338. sequent. Braunschweig. Chronick. folio 137.