Die Schedelsche Weltchronik (deutsch):101

100 <<<Vorheriges Blatt	Die Schedelsche Weltchronik Blatt CI	Nächstes Blatt>>> 102

unkorrigiert	Dieser Text wurde noch nicht Korrektur gelesen. Allgemeine Hinweise dazu findest du bei den Erklärungen über Bearbeitungsstände.

C verso:[Bearbeiten]

Das sechst alter

Nurmberg ist in gantzem teu^etschen land vnd auch bey eu^eßern vo^elckern ein fastnamhaftige vnd weyt besuchte stat. Ein beru^embts gewerbhaws teu^escher[sic!] land. vnd mit scho^enen gemaynen vnd sundern gepewen gezieret. Ein konigliche fast alte burg fu^erscheint ob eim berg vber die statt auff. daruon ist ein gesichte in die statt vnd darauß. Ettlich maynen das der statt ir namen von derselben burg entsprungen sey. So sprechen ettlich. das sie von Tiberio nerone dem kayser nach Resgenspurg[sic!] gepawet. oder von Druso nerone seinem bruder (der die teu^etschen bestritten hat) Neroberg genant worden sey. dann Tiberius der keyser zohe sein vaterlichs geslecht von Tiberio nerone. Derselb het (als Swetonius tranquillus schreibt) Liuiam Drusillam also schwangere. vnd doch auch dauor bey ime eins suns genesen. dem Octauiano auff sein begeren ergeben. vnd starb vnlang darnach. vnd ließ hinder ime die zwen su^en Tiberium vnd Drusum nach ime Nerones zugenambt. dann Nero bedeu^et nach sabinischen gezu^eng souil als starck oder gestreng. Nachfolgend hat der Tiberius Burgundien vnd Franckreich. die von einlawffung des barbarischen volcks. vnd auß zwittracht der fu^ersten vnru^oesam waren geregiert. vnd darnach die krieg amm o^eberen kies. amm Lechfeld. an der Thonaw vnd in theu^etschen landen nacheindander gefu^ert. vnd in den selben kriegen die Algewer vnd auch die Dalmacier ernidergelegt vnd sunderlich in dem teu^etschen krieg bey xl^m. ergebener menschen in Galliam gefu^ert vnd sie bey dem gestadt des Rheins in wonung vnd bleibung nidergesetzt. darumb zohe er mit zierlichen sygzaichen nach Ro^emischem sytten geschmu^ecket fro^elich gein Rome. Aber sein glori vnd machtigkeit wardt darnach mer vnd mer erweytert. da er dz gantz kriechenland das innerhalb welschs lands vnd dem Norkewischen[?] reich vnd traciam vnd Macedoniam vnd zwischen der Thonaw vnd dem Adriatischen meer ligt zu gehorsam vnnd ergebung gebracht het. Diser Claudius tiberius nero (als Eutropius setzt) was ein klu^og man in den wafen vnd glu^eckhaftig genu^og vor seiner angenomner herrschung. vnd schaffet das die stett mit seinem namen genent werden solten. Aber die allereltisten bu^echer der geschihtbeschreiber haißen dise burg ein norckewisch geschloß. dann auff das die Ro^emer den feynden die sich nach dem gepirg enthielten ir vberziehung weeren mo^echten so paweten sie an den bergen des Norckaws vnd in vil gegenten teu^etzsch lannds bu^erg vnd geschlo^esser. also hat auch dise statt ein einige ho^eh darauff dise alte burg zu hu^ot der statt gepawen ist. Vnd wiewol (als der hohberu^embt babst Pius der ander von diser statt schreibt) ein zweifel ist ob sie des Frenckischen oder Bayrischen lands sey. so zaigt doch ir namen an das sie zum Bayer land geho^ere. so sie doch No^ermberg. gleich als Norckaws berg geheißen wirdt. dann die art oder gegent zwischen der Thonaw vnnd No^ermberg gelegen heißt das Norckaw. Dise statt ligt aber in dem Bambergischen bisthumb das zu Francken geho^ert. doch wo^ellen die Nu^ermberger weder Bayern noch Francken aber ein drittes besunders geslecht sein. Dise statt wirdt durch ein fliessends wasser die Pegnitz genannt enmitten getaylt in zwu stett. so kombt man von einer in die andern auff vil scho^enen staynin prugken vber dasselb wasser auffgerichtet. vnd ist auff eim vnfruchtpern vnnd sandigen erdpoden erpawen. vnd auß diser vrsach alda ein arbeitsams emsigs volck. dann alle die. des gemaynen volcks sind entweders fastsinnreich wercklewt. erfinder vnd maister mancherlay wunderwirdiger subtiler arbait vnd kunst zum geprauch menschlicher notdurft vnd zierde dienstlich. oder aber gar anschlagig kaflewt vnnd gewerb treyber. Vnd wiewol auch dise statt von ettlichen fu^er new geachtet wirdt darumb das in den schrifften der alten wenig dauon geschriben gefunden werde. vnnd auch keynerlay fu^oßstapffen oder anzaigung des alters darin erscheynen dann allain die vorbemelt alte burg vnd ettliche hewser. des sich doch nymant verwundern soll. denn auch von vil andern treffenlichen stetten nit allain teu^etscher sunder Auch Welscher vnd andrer land. vnnd sunderlich von der in aller werlt beru^embtisten statt Rom irs vrsprungs. alters vnd stiffters mancherlay zweifellicher wone vnd vermu^otung vnder den geschihtschreibern erscheinen. yedoch so ist wissentlich das dise statt zu der zeit des großen kayser Karls in plu^eendem wesen gestanden ist. dann nach dem derselb Karolus ein konig zu Franckreich die kyrchen vnd auch das ro^emisch reich auffen vnd meren wolt vnd die Sachsen gezamet vnd die Britannier vnd Gallier zu ime in pu^endnus gebracht. vnd auch mit Tassilone dem hertzogen zu Bayern auß volg babst Adriani friden auffgenomen het. vnd aber derselb Tassilo nach beschehner fordrung weder selbs komen noch auch die außgeding versprochen layst bu^ergen schicken wolt. do name Karolus wider denselben Tassilonem einen krieg fu^er. vnd fu^eret die heer in Bayern taylende das volck auff drey ort vnd verordnet die o^esterreicher thu^ering vnnd sachssen sich bey der Thonaw zelegeren. so blib Pipinus sein sun mit dem welschen heer zu Trient. Aber karolus hielte sein wartt mit dem dritten teil des heers zu Nu^ermberg vnd in den nahenden enden daselbst vmb vnd pawet in form vnd gestalt seins gezeltes bey Nu^ermberg ein kirchlein das nachfolgend durch babst Leo den dritten. der dem benannten Karolo gein Padeporren in Sachssen nach zohe. auff dem widerweg gein Rom in sannt Katherinen der iunckfrawen vnd martrerin ere geweiht worden ist vnd yetzo zu dem alten fu^ert genant wirdt. Ettlich sagen das dise statt ettwen vnder des edeln herren Albrechts grafen zu Francken gewalt gewesen vnd nach absterben desselben grafen (der auß veruntreu^eung hattonis des bischoffs zu Maintz von kayser Ludwigen vmbracht wardt) an das Ro^emisch reich gelangt sey. Nach dem aber dise statt an das Ro^emisch reich komen ist so ist sie seydher mit hoher trew vnd bestendigkeit dem Ro^emischen reich vnuerwenckt angehangen. vnd hat den ro^emischen konigen alweg hohbestendigen glawben vnnd trew gelaystet. vnd darumb auch in zwitrachtigkeit der Ro^emischen kayser schwere bedrangknus vnd schaden erlidden. vnd sunderlich dieweil keyser heinrich der vierd regiret. vnnd ine konig heinrich sein sun auß go^etlicher rachsale (als man maynet) mit krieg verfolget. Als nw die Nu^ermberger ir

CI recto:[Bearbeiten]

Blat CI

der werlt

trew an seinem vater hielten do wardt die statt Nu^ermberg durch den sun mit hilff der seinen belegert vnd gewunnen. als dann die glawbwirdigen geschihtbeschreiber Otto frisingensis vnd Gotfridus viterbiensis beschreiben [Punkt fehlt?] Derselb konig Heinrich zohe gein Wurtzburg vnd setzet bischoff Erlongum ab vnd Robertum ein. darnach ließe er die Sachsen haym ziehen vnd eroberte mit den Bayern das Norckawisch schloss zu Nu^emberg. als er das zwen monat oder mer belegeret het do zohe er gein Regenspurg in die hawbtstat des Norckawischen hertzogthumbs den volget der vater alßpald nach. vertribe den bischoff Robertum vnd setzet Erlongum wider ein. do zohe er fu^erter vnnd veriaget mit hilff der von Regenspurg den sun auß der statt vnd setzet daselbst bischoff Ulrichen ein. vnd zersto^eret durch die Beheim die Marckh Theobaldi. Konig Conrad der Schwab. der nach absterben Lotharij zu ro^emischem konig erclert wardt. vnd auß rat sant Bernharts einen heerzug wider die vnglawbigen fu^ername hat dise statt wider auffgerichtet vnd ein lo^eblich closter vnd abtey sant Benedicten ordens zu sant Egidien genant an eim gelegnern enden der statt gestiftet. vnd ist auch die statt durch nachfolgend hilff stewr vnnd begnadung desselben konig Conrats vnd anderer ro^emischen kaiser vnd konig zu auffung komen. Aber nit ist zeglawben das sie vom[?m] anfang irer widerauffrichtung solcher zierde vnnd weyte gewesen sey. sunder sie ist zu den zeitten Karls des vierden ro^emischen keysers vnd konigs zu Beheym mit weiterm vmbkrais eingefangen vnd mit newen zinnen vnd mit eim weytten vnd tieffen gerigs vmb die stat gefu^erten graben. vnd mit iij^c. lxv. thu^ern[sic!]en. ergkern[n?] vnd vorwern[?] an den zwayen innern mawrn gemeret vnd mit fast weiten vnd festen inwonungen gezieret vnd schier in den mittel teu^etschs lands gelegen. vnd die burgere daselbst haben auß vnderrichtung keiserlicher gesetze eins ratspflegnus vnd burgermaisterliche ordnung von der gemaynd vnderschiden. dann die burgere des herkomens von alten erbern geslechten daselbst pflegen gemayner statt sachen. so wartet die gemaind irer henndel. In diser statt sind vil weyte vnd wolgezierde gotzhewßer. auch zwu pfarr. sant Sebalds vnd sand Laurentzen kirchen. vnd der petlo^erden vier wolerpawte clo^ester die die burger in mancherlay zeiten aufgerichtet haben. Die geistlichen iunckfrawen haben daselbst zway clo^ester Eins zu sant Katherein. das ander zu sant Clara genant. So haben die teu^etschen herren ein große weitte der statt innen. Da ist auch ein Cartheu^eser closter an großtatigkeit des gepews fast weit vnd scho^en. Auch ein konigclicher wolgezierter sal der allerhailigsten iunckfrawen Marie am[m?] marck mitsambt einem aller scho^ensten prunnen. Dise statt frewet sich nicht wenig irs konigclichen patrons sant Sebalds der in seinem leben vnd mit wunderwerken also erleu^echtet gewest ist das er auch dise statt erleu^echtet hat. Sie frewet sich auch der keyserlichen zaichen. als des mantels. schwerter. scepters. der o^epffel vnd kron des großen keyser Karls die die zu nu^emberg [sic!] bey ine haben. vnd die in der kro^enung eins ro^emischen konigs von der heiligkeit vnnd alters wegen einen glawben geben. so wirdt auch dise statt sunderlich hohgezieret mit dem vnerschetzlichen vnd go^etlichsten sper. das die seyten Jhesu cristi am creu^etz geoffent hat. Auch mit einem mercklichen stuck des creu^etzs vnd anderen in der gantzen werlt zewirdigen heilthumen. die ierlich zu o^esterlicher zeit offentlich daselbst mit großer solennitet vnd zierlichkeit gezaigt werden.

Der heilligen streyttenden kirchen grundfestungen darauff sich das gantz zimmer diss gepews vertrawenlich steu^eert sind die heiligen apostel. dann got hat dieselben als erste opffer zu hail aller vo^elcker erwelet. Dise sind die grundseu^eln oder pfeyler der kirchen auff der grundfeste (on die nymant einiche andere grundfest setzen mag) die do ist Cristus Jhesus mit dem ho^ehsten egkstayn befestigt. das die warheit die vormals in dem preyse des gesetzs vnd der propheten schwebet. durch die apostolischen pusawmen zu hail aller werlt außgienge. dann es ist geschriben. In alles ertrich ist außgegangen ir stymm. wann von inen ist die kierch entsprossen vnnd bis zum ende der werlt mit dem wort der verku^endung außgestreckt. Sie haben dise kirchen mit lere. mit wunderzaichen. mit ebenpilden vnd mit plu^otuergissen gepflantzt. darumb werden sie billich veter. stifter. pawere ordner. hirten. bischoff vnd wegmacher der gemaynen kirchen genant. Aber das sacrament diser gabe hat der herr also zu dem ambt aller apostel wo^ellen geho^eren. das er es in dem seligsten Petro aller apostel dem ho^ehsten setzet. das er von ime als einen hawbt mit seiner gabe als in allen leib ergu^esse. das sich der. der go^etlichen heymlichen verborgenheit entsetzet verstu^ende der von der festigkeit Petri abweichen geto^erste. dann der herr hatt ine in die mit verwandtschaft der vnteylpern einigkeit also genomen. das er ine das. das er selbs was nennet sprechende. Du bist Petrus vnd auff disen felsen wirdt ich pawen mein kirchen. das der paw des ewigen tempels in wunderperlicher begabung mit der gnaden gottes auff der festigkeit Petri stu^ende. vnd er hat dise kirchen mit seiner bekreftigung also gestercket das menschliche vermessenheit vnd frefel sie nit erraichen noch auch die hellischen pforten wider sie gesygen mo^echten.