Die Schedelsche Weltchronik (deutsch):230

229 <<<Vorheriges Blatt	Die Schedelsche Weltchronik    Blatt CCXXX	Nächstes Blatt>>> 231
unkorrigiert	Dieser Text wurde noch nicht Korrektur gelesen. Allgemeine Hinweise dazu findest du bei den Erklärungen über Bearbeitungsstände.

 

CCXXIX verso:

Das sechst alter

PRag ein hawbtstatt des Behmischen ko^enigreichs ist ein fast große stat. der beschreibung von irs alters wegen billich vorlangst gesetzt solt worden sein. Aber nach dem kaiser Karl der vierd: der behmisch ko^enig vil großtetiger gedechtnußwirdiger sachen bey diser statt geu^ebet hat so ist ir beschreibung bis nach meldung solcher seiner henndel ansteend bliben. Nw dise statt Prag hat (als die behmischen historien sagen) nach den zeitten des patriarchen Abrahe anfang gehabt. vnd ist ein erber ko^enigclicher bischoflicher stu^ol. vnd in drey tayl. nemlich in klein prag. alt prag vnd new prag getailt. Klein prag begreift die lingken seytten der Mulda vnd beru^ert den berg auff dem dann der ko^enigclich hoff vnnd sant Veits bischofliche thumkirch ligt. Alt prag ligt gantz in einer ebne. mit großtatigen hohlo^eblichen gepewen gezieret. Auß derselben alten statt kombt man in die klainen vber ein staynine prugken. die hat .xxiiii. schwinbogen. So ist die new statt von der alten mit eim tieffen graben gesu^endert. vnd vmb vnd vmb mit mawrn bewaret. Dise statt ist fast weyt vnd streckt sich bis an sant Karls vnd sant Katherinen berg vnd bis an den vischerat. der dann in gestalt eins schloss gepawt ist. Daselbst ist das collegium der schu^ol. Dise statt ist hohberu^embt vnd namhaftig in behmerland. das dann zu teu^etschen lannden geho^ert. vnnd ligt schier alle gein den lu^eften mitternacht. vnd hat ein rotunde gestalt. vnd allenthalben vom mittel an die o^erter drey tagrayse vnd einen wald gantz vmb sich. vnd wirdt mit vil flu^eßen befeu^echtigt. darunder ist die Mulda der gro^esist. die dann in die hawbtstatt Prag fleu^eßt. Als nw des namenshalben diser stat wie die gehaißen werden solt zwaiung entstund do verordnet Libussa die fu^erstin das man auß der wercklewten einen der zum ersten begegnet fragen solt was er machet. alßdann solt die statt nach dem ersten wort desselben werckmans antwurt genambt werden. also ward erstlich ein zymmerman gefragt. der sprach er machet ein geschwel. das heißt nach behmischem gezu^enge praha. von dannen her wardt dise statt mit verzucktem wort Praga genannt. In disem land haben die Amasonischen weiber ettliche zeit. vnnd darnach hertzogen geherrschet bis auff Vratislaum den ersten ko^enig. der dann nach der gepurt cristi .M.lxxxvi.^[1] zu Mayntz in versamlung der fu^ersten von kaiser Heinrichen dem fu^enfften zu ko^enig zu beheim erklert. vnd merhern. schlesia vnd lausitzerland demselben behmischen ko^enigreich zugewendt ward[.]

CCXXX recto:

der werlt

Blat CCXXX

Darauff ward Gilbertus ertzbischoff zu Tryer mit disem Vratislao gein Prag gesendet. denselben Vratislaem vor der landschaft zu ko^enig zesalben vnd mit ko^enigclichen wirden zezieren. Derselb Vratislaus hat mit verwilligung babsts Alexandri des dritten ein versamlung geregelter chorherren in dem Pragischen schloss auffgerichtet. darinn sich dann nicht allain der probst sunder auch der techant vnnd der briester. ewangelier vnnd epistler so sie die go^ettlichen ambt halten bischoflicher zierde geprauchen. vnd der probst ein cantzler des ko^enigreichs genannt gepraucht sich auch fu^erstlicher wirdigkeit. Ettlich sagen Behmer land sey durch kaiser Friderichen den ersten auß eim hertzogthumb zu eim ko^enigreich erhebt worden. Darnach hat graff Vlrich zu kerndten der keynen manlichen erben het von Othocaro dem behmischen ko^enig gelt empfangen vnd ime darfu^er Kerndten Crayn die Windischen marck vnd Portunaw vbergeben. Zu letst bey zeiten kaiser Karls des vierden ist das behmisch ko^enigreich in großer mechtigkeit glori vnd wunderperlicher zunemung gestanden. also das kein ko^enigreich in gantzem Europa dem behmischen gegleichen mocht. an manigfeltigkeit. ko^estlichkeit. vnd zierlichkeit der kirchen vnd gotzhewser. mit hohen. herrlichen. weyten. hu^ebschen. wercklichen. liechten vnnd scheinperlichen gepewen auffgerichtet. vnd mit scho^enen ko^estlichen silberinen vnd guldinen ornaten. klaynaten. edelmgestayn. klaydungen vnd zierden begabet. vnd nicht allain in stetten sunder auch in do^erffern. Vnder andern was ein ko^estlich closter zu Prag an der Mulda gelegen. daselbstinn hetten die behmischen ko^enig ire begrebnus. In demselben closter was außerhalb anders seins ko^estlichen vnd gedechtnußwirdigen gepews ein weyter scho^ener vieregketer creu^etzgang. darinn was das alt vnd new testament von anbegynn des gescho^epfs bis auff sant Johans heymliche offenbarung in tafeln mit so^elchen scho^enen fo^elligen bu^ochstaben geschriben das es ein yeder vom ho^ehsten bis herab leichtlich lesen mocht[.] Diss behmer land was ein plumm der su^eßigkeit. das ettwen vnder den fu^ersten vnd ko^enigen einen su^eßen ru^och vnd geschmack von ime gabe. Aber nw hat es layder einen vberru^eechenden gestanck. got wo^el das er schier widerumb zu su^eßem geru^echde vnnd schmack gelang. Die historien diss bemischen lands vnnd geschihten seiner ko^enig hat babst Pius der ander gar treffenlich beschriben.

Prag

---

1. 1086 n. Chr.