Doctor Brants Narrenschiff/Von Verführung am Feiertage

« Von Hoffnung zu erben	Sebastian Brant Doctor Brants Narrenschiff	Schenken und bereuen »
fertig Fertig! Dieser Text wurde zweimal anhand der Quelle Korrektur gelesen. Die Schreibweise folgt dem Originaltext.
Für eine seitenweise Ansicht und den Vergleich mit den zugrundegelegten Scans, klicke bitte auf die entsprechende Seitenzahl (in eckigen Klammern).

Mancher solt zu^o der kyrchen gan
Vnd an dem fyrtag mu^essig stan
Der sich doch vil geschefft nymbt an

von verfurung am fyrtag.

Das sint burger zu^o Affenbergk
Die all jr sachen / vnd jr werck
Sparen alleyn vff gebannen tagen
Die mu^essen vff den affen wagen

5

Dem eynen / mu^oß man roß beschlagen

Dem andern kno^epflin setzen an
Das man nu^on langst solt han gethan
Do man saß by dem spyl vnd wyn /
Dem füllet man die spitzen syn

10

Vil hudelen mu^oß man dar jn stossen /

Dem mu^oß man an tu^on ro^eck / vnd hosen
Das mo^echt er sunst nit legen an
Hett ers nit vff eyn fyrtag gthan /
Die ko^ech zu^o richten für / vnd glu^ot

15

Ee man die kilch morgens vff du^ot

So fyndt man by jn schlemmen vnd prassen
Ee yemans recht kumbt / vff die gassen
So sint die wynhüser schu^eer voll
Das tribt man on end yemerdol

20

Vor vß / vff den gebannen tagen /

So andere werck sint vnderschlagen
So du^ot man faren mit den karrhen /
Der fyrtag manchen macht zu^om narren
Der meynt der fyrtag sy erdacht

25

Das kleyner arbeit gott nit acht

Als / das mans holtz jm spielbra^et schlag
Vnd kartten sitzt eyn gantzen tag
Vil lont sunst wercken jr gesynd
Vnd hant keyn acht / das dienst vnd kynd

30

Zu^o kyrchen / predig / gotz dyenst gon

Oder fru^eg zu^o der meß vff ston
Den ma^et went sie erst recht vß kochen
Den sie gesotten hant die wochen /
Keyn hantwerck ist dem nit gefu^eg

35

Das es am fyrtag ettwas du^eg

Sy sint dem pfenning also gferd
Als ob keyn tag me wer vff erd
Eyn teyl stont schwa^etzen vff der gassen
Die andern sytzen spielen / prassen

40

Manchem jm wyn do mer zerrynt

Dann er eyn woch mit arbeit gewynt
Der mu^oß eyn schmu^ertzler / hümpler syn
Wer nit will sitzen by dem wyn
Tag / vnd nacht / biß die katzen kreygt

45

Oder der morgen lufft har weygt /

Die juden spotten vnser ser
Das wir dem fyrtag du^ont solch er
Den sie noch halten also styff
Das ich sye nit jnns narren schiff

50

Woltt setzen / wann sie nit all stunt

Sunst jrrten / wie eyn touber hundt
Eyn arm man holtz am fyrtag laß
Vnd wart versteynt / alleyn vmb das /
Die Machabeer woltten nitt

55

Am fyrtag weren sich zu^o stritt

Jr wurden vil erschlagen dott /
Man samlet nit das hymelbrott
Vff den fyrtag / als gott gebott /
Aber wir arbeytten on not

60

Vnd sparen vil / vff den fyrtag

Das wir nit tho^on went andere tag
O narr den fyrtag halt / vnd ere
Es sint noch wercktag vil vnd mere
Wann du schon fulest jn dem grunt

65

Vß gyttikeit als laster kunt