Doctor Brants Narrenschiff/Von unbesonnenen Narren

aus Wikisource, der freien Quellensammlung
« Von Schriftverächtern Sebastian Brant
Doctor Brants Narrenschiff
Von Buhlschaft »
fertig
Fertig! Dieser Text wurde zweimal anhand der Quelle Korrektur gelesen. Die Schreibweise folgt dem Originaltext.
Für eine seitenweise Ansicht und den Vergleich mit den zugrundegelegten Scans, klicke bitte auf die entsprechende Seitenzahl (in eckigen Klammern).


[16v]

 Wer nit vor gürt / een dann er rytt
Vnd sich versicht vor hyn by zyt
Des spot man / falt er an eyn sytt



Von unbesinten narren


Der ist mit narrheyt wol vereynt
Wer spricht / das hett ich nit gemeynt
Dann wer bedenckt all ding by zyt
Der satlet wol / ee dann er ryt

[17r]

5
Wer sich bedenckt noch der gedat

Des anschlag gmeynlich kumbt zuo spat /
Wer jnn der gdat guot anschleg kan
Der muoß syn eyn erfarner man
Oder hat das von frowen gelert

10
Die syndt sollchs rates hoch geert

Hett sich Adam bedacht vorbaß
Ee dann er von dem appfel aß
Er wer nit von eym kleynen biß
Gestossen vß dem Paradiß /

15
Hett Jonathas sich recht bedacht

Er hett die goben wol veracht
Die jm Tryphon jn falscheyt bot
Vnd jn erschluog dar noch zuo dot /
Guot anschleg kund zuo aller zyt

20
Julius der keyser / jn dem stritt

Aber do er hat fryd vnd glück
Sumbt er sich an eym kleynen stuck
Das er die briff nit laß zuo hant
Die jm jn warnung worent gsant /

25
Nycanor vberschluog geryng

Verkoufft das wyltpret / ee ers fyng
Syn anschlag doch so groeplich faelt
Zung / handt / vnd grynt man jm abstraelt
Guot anschlaeg die sint all zyt guot

30
Wol dem / der sy by zyten duot

Mancher ylt / vnd kumbt doch zuo spot
Der stoßt sich bald / wem ist zuo not /
Wer Asahel nit schnel gesyn
Abner hett nit erstochen jn