Ein rein hohgemvͤte (Mit aufgelösten Abbreviaturen)

Ein rein hohgemvͤte·
dc núwan nah eren stat·
dc lob ich an der vrowen min·
darzv̊ maniger slahte gvͤte·
zv̊ der schoͤne vnd si hat·
sol si von dem getúret sin·
so hat si bi allen gv̊ten wiben werdekeit·
liege ich iv vmb ein har· des ich ú han geseit·
es ensi an der lieben gar·
sone gesage ich niemer wort der werlte war·

Sit dc dv minne merist·
swc in dinen hulden ist·
truren vnd hohen mv̊t·
swie so dvs danne kerest·
sit dc dv also gewaltig bist·
so wis minen froͤiden gv̊t·
weistv wol dc genade bi^{[WS 1]} gewalte zimt·
dc ein wib so kleine mine klage vernimt·
dc wêne ich gar von dinen schulden si·
woltest dv alleine da wer me genaden bi·

Vil minneklichú minne·
schowe dc dv selig sist·
mir ist von dinen schulden we·
dv hast mir gar die sinne·
vnd ǒch dc herze an si gewist·
so dir got minne nv fuͤge ǒch me·
dv solt eines raten dc dinem namen wol gezeme·
dc ein wib zegv̊te mine klage verneme·
minne ich han an menigem wolgesehen·
bistus vlizig mir mag alles gv̊t von dir geschehen·

Anmerkungen (Wikisource)

1. Vorlage: genade bi genade bi.