Ich bin her bi minen stvnden

ICh bin her bi minen stvnden·
ofte worden minne wunt·
da fúr han ich helfe funden·
des sicht man mich wolgesvnt·
swc dú minne mir mit twingen tůt·
da fúr han ich arzenie dú ist gv̊t·

Do dú minne mir verwundet·
mit ir strâl das herze min·
dc hat schiere mir gesvndet·
miner frowen liehter schin·
swenne ich sihe ir liehte varwe clar·
so sint mir geheilet mine wunden gar·

Ich salbe mit vil svͤssen salben·
mine wunden hie vnd dort·
in dem herzen allenthalben·
dú salbe ist manig svͤsses wort·
dv́ vs miner frowen mvnde gant·
da von mines herzen wunden ende hant·

Als ich balsen wil dú ǒgen·
herze sinne vnd den lip·
so gen ich svnder lǒgen·
vnd sihe an dc werde wip·
da von wirt min lip sa froͤiden ivng·
vnd mv̊s mir das herze springen manigen sprung·

Vs ir klein vel rotem mvnde·
svͤsse svͤsse sv̊sse gat·
die^{[WS 1]}nimt si in herzen grunde·
der si da grôs wunder hat·
si ist schoͤne reine gvͤtlich gv̊t·
es ist lieplich svͤsse gv̊t· swas si mir tůt·

Ich wolde dc ir liehten ǒgen·
in min herze moͤhten sehen·
da sehe si der liebi tǒgen·
so dc si des mvͤste iehen·
dc si mir ist liep fúr ellú wip·
vnd fúr war vil lieber danne min selbes lip·

Got weis wol mir ist ir ere·
lieber danne dv́ ere min·
ir lip ist min eren lere·
ich wil ir zedienest sin·
svnder wenken al die wile ich lebe·
si ist min trost fúr trvren vnd min froͤiden gebe·

Anmerkungen (Wikisource)

1. Vorlage: dv́.