Ich sage iv lieben sv́ne min

aus Wikisource, der freien Quellensammlung
Textdaten
Autor: Spervogel
Illustrator: {{{ILLUSTRATOR}}}
Titel: Ich sage iv lieben sv́ne min
Untertitel:
aus: UB Heidelberg 416r und UB Heidelberg 416v
Herausgeber:
Auflage:
Entstehungsdatum: 12. Jahrhundert
Erscheinungsdatum: Vorlage:none
Verlag: Vorlage:none
Drucker: {{{DRUCKER}}}
Erscheinungsort:
Übersetzer:
Originaltitel:
Originalsubtitel:
Originalherkunft:
Quelle: UB Heidelberg und UB Heidelberg
Kurzbeschreibung:
Mit aufgelösten Lettern. Vergleiche auch Ich ſage iv liebē ſv́ne min in Originallettern.
Eintrag in der GND: {{{GND}}}
Bild
[[Bild:|250px]]
Bearbeitungsstand
korrigiert
Dieser Text wurde anhand der angegebenen Quelle einmal Korrektur gelesen. Die Schreibweise sollte dem Originaltext folgen. Es ist noch ein weiterer Korrekturdurchgang nötig.
Um eine Seite zu bearbeiten, brauchst du nur auf die entsprechende [Seitenzahl] zu klicken. Weitere Informationen findest du hier: Hilfe
[[index:|Indexseite]]


[416r]

Ich sage iv lieben sv́ne min·
iv enwahset korn noch der win
ich enkan iv niht gezeigen·
dú lehen noch dú eigen·
nv genade iv got der gv̊te·
vnd gebe iv selde vnd heil·
vil wol gelang von tenemarke frůten·

Mich rúwet vurůt vber mer·
vnd von husen walther·
heinrich von gebechen stein·
vnd von stǒfen wc ir noch ein·
got genade wernharte·
der vf steinsberch saz
vnd niht vor den eren versparte·

Wer sol vf steinberg·
wúrken wernhartes werk·
hei wie er gab vnd lech·
des er dem biderben man verzech·
des enmoht er niht gewinnen·
dc wc der wille kom dú statte·
si schieden sich zeivngest mit minnen·

Do der gv̊te wernhart·
an dise werlt geborn wart·
do begvnde er teilen al sin gv̊t·
do gewan er ruͤdegeres mv̊t·
der saz zebechelere·
vnd pflag der marke mangen tag·
der wart von siner frúmekeit so mere·

Steinberg die tvgende hat·
dc es sich nieman [416v] erben lât·
wan ein der ǒch eren pfligt·
dem strite hat es an gesigt·
nv hat es einen erben·
der werden oͤtinger stam
der wil in sinen namen niht verderben·

Man seit zehove mere·
wie gescheiden were·
kerling vnd gebehart·
si liegent sem mir min bart·
zwene gebrv̊der die gezúrnent·
vnd vnder zúnent den hof·
si lant iedoch die stigelen vnverdúrnet·

Mich mvͤt dc alter sere·
wans hergere
alle sine kraft benam·
es sol der gransprvnge man
bedenken sich enzite·
swen er zehove werde leit·
das er zegewissen herbergen rite·

Swie sich der riche betraget·
so dem nothaften waget·
dvr das lant der stegreif·
dc ich zebuwe niht engreif·
do mir begvnde entspringen
von alterst min bart·
des mv̊s ich nv mit arbeiten ringen·

Weistu wie der igel sprach·
vil gv̊t ist eigen gemach·
zimber ein hus kerling·
darinne schaffe dinú ding·
die herren sint erarget·
swer da heime niht enhat·
wie maniger gv̊ter dinge der darbet·

Swie dc wetter tv̊·
der gast sol wesen vrů·
der wirt hat truchenen vůs·
vil dike so der gast mv̊s·
die herberge rumen·
swer in dem alter welle wesen
wirt der sol sich in der ivgent niht svmen·

Es was ein wolf grave·
vnd ein man al were·
die lúte wolten slafen·
er lie den wolf zen schafen·
do begieng er in der stige·
das man man in des morgens hieng·
vnd iemer me sin kún̄e ane schriet·

Ein wolf vnd ein witzig man·
sasten schahzabel an·
si wurden spilnde vmbe gv̊t·
der wolf begvnde sinen mv̊t·
nach sinem vatter wenden·
do kom ein wider dar gegan·
do gab er beide roch vmb einen venden·

Ein wolf sine sv́nde floch·
in ein kloster er sich zoch·
er wolde geistlichen leben·
do hies man in der schafe pflegen·
sit wart er vnstete·
do beis er schaf vnd swin·
er iach dc es des pfaffen rúde tete·

Es mag der man so vil vertragen·
hort ich kerlingen sagen·
dc man in dest wirs hat
so wirt sin svs vil gv̊t rat·
ist er wider sezze·
zwene hvnde stritten vmb ein bein·
do stůnt der boͤser vnd grein·
do trůg es hin zeivngest der rezze·

Zwene hvnde stritten vmb ein bein·
do stv̊nt der boͤser vnd grein·
wc half in alsin grinen·
er mv̊stes bein vermiden·
der ander trůg es·
von dem tische hin ze der túr
er stv̊nt ze siner gesiht vnd genv̊g es·