Ir ſvlt ſpꝛechē willekomē

IR ſvlt ſpꝛechē willekomē·
der mere bꝛinget dc bin ich·
alles dc ir habent v̾nomē·
daſt gar ein wint nv fragent mich·
ich wil miete·
vn̄ wirt min lon icht gůt·
ich ſage lihte dc iv ſanfte tůt·
ſehet wc man mir eren biete·

Ich wil tútſchen frowē ſagē·
ſolhú mere dc ſi deſte bas·
alder w̾lte ſvln behagen·
ane groſſe miete tůn ich dc·
ze richeme lone·
ſint ſi mir zehere·
ſo bin ich gefuͤge vn̄ bitte ſi nihtes mere·
wan dc ſi mih gruͤſſen ſchone·

Tútſche man ſint wol gezogē·
als engel ſint dú wib getan·
ſwer ſi ſchildet der iſt betrǒgen·
ich enkan ſin anderſ niht v̾ſtan·
tvgent vn̄ reine mīne·
ſwer die ſv̊chen wil·
der ſol komē in vnſer lant da iſt wūne vil·
lange mvͤſſe ich leben dar inne·

Ich han lande vil geſehen·
vn̄ nam d̾ beten gerne war·
úbel mvͤſſe mir geſchehen·
kvnde ich ie min h̾ze bꝛingē dar·
dc ime wolde wol gevallen·
froͤmder ſitte·
was hulfe mich ob ich vnrehte ſtritte·
tútſchú zv̊ht gat voꝛ in allen·

Von der elbe vnz an den rin·
vn̄ wid̾ vnz in vngerlant·
ſo mvgen wol die beſten ſin·
die ich in der w̾lte han bekāt·
kan ich ſchǒwen·
gv̊t gelêſſe vn̄ den lib·
ſem mir got ſo ſwuͤre ich wol dc da dú wib·
beſſer ſint danne and̾ſwa die frowē·

Der ich vil gedienet han·
vn̄ iemer gerne dienē wil·
dú iſt vō mir vil vnerlan·
ie doch ſo tůt ſi leides mir ſo vil·
ſi kan ſeren·
mir dc h̾ze vn̄ den mv̊t·
nv v̾gebes ir got dc ſi an mir miſſe tůt·
her nach mac ſi ſichs bekeren·