Ob allen tvgenden hohe treit (Mit aufgelösten Abbreviaturen)

aus Wikisource, der freien Quellensammlung
Zur Navigation springen Zur Suche springen
Textdaten
Autor: Johann von Ringgenberg
Illustrator: {{{ILLUSTRATOR}}}
Titel: Ob allen tvgenden hohe treit
Untertitel:
aus: UB Heidelberg 191r, UB Heidelberg 191v und UB Heidelberg 192r
Herausgeber:
Auflage:
Entstehungsdatum: 13. Jahrhundert
Erscheinungsdatum: Vorlage:none
Verlag: Vorlage:none
Drucker: {{{DRUCKER}}}
Erscheinungsort:
Übersetzer:
Originaltitel:
Originalsubtitel:
Originalherkunft:
Quelle: UB Heidelberg, UB Heidelberg und UB Heidelberg
Kurzbeschreibung:
Mit aufgelösten Lettern. Vergleiche auch Ob allen tvgenden hohe treit in Originallettern.
Wikipedia-logo-v2.svg Artikel in der Wikipedia
Eintrag in der GND: {{{GND}}}
Bild
[[Bild:|250px]]
Bearbeitungsstand
korrigiert
Dieser Text wurde anhand der angegebenen Quelle einmal Korrektur gelesen. Die Schreibweise sollte dem Originaltext folgen. Es ist noch ein weiterer Korrekturdurchgang nötig.
Um eine Seite zu bearbeiten, brauchst du nur auf die entsprechende [Seitenzahl] zu klicken. Weitere Informationen findest du hier: Hilfe
[[index:|Indexseite]]

[191r]

Ob allen tvgenden hohe treit·
vrô trúwe die krone· si ist das alre beste kleit·
das man an sich gesniden· kan si gestet wol vor aller edelen wête·
wie wol man sich gekleidet· hât·
mit golde mit siden· vnd mit aller richer wât·
vnd wonet da niht trúwen bi· so ist es doch ze hove ein krank gerête·
gegen einem werden biderben man·
ist er ioch arn der trúwe· hat in mv̊te·
so sol er doch me eren han·
danne der vngetrúwe riche mit allem gv̊te·
wie gezimt der truwen waltet niht·
der mv̊s mit laster haben pfliht·
so ere den getrúwen hat steteklich beslossen in ir werden hv̊te·

Untrúwe dast ein selig hort·
der stvͤften kan rǒb vnd brant vnde groze mort·
vnd werden man vnwerden mag vnd frǒwen wisen vs vro selden hv̊te·
vntrúwe ist alr vntvgenden vol·
si kan zer helle man vnd wip verwisen wol·
die anders niemer kemen dar hetens nit vntrúwe in ir mv̊te·
got der ist vntrúwen gehas·
er geschv̊f vnd hies das man getrúwe were·
gelǒbent mir wer haltet das·
der wirt ze ivngest aller sorgen lere·
got wil das trúwe zů zim var·
so hoͤrt vntrúwe zer helle schar·
swer trúwe hat den wil got nen ze dem himelriche·
da er wirt froͤidebere·

Aller wîte ein vmbekreis·
der hoͤhsten hoͤhe ein v́berhoͤher der da weis·
aller herzen sin vnd gedank vnd ǒch geschaffen hat alle creaturen
dv bist endeloser rief ein stam·
wasser luft fúr erde dú hast geschaffen sam·
an ir natúr vnd aller geschepfde was wesens ist gehúre· ald vngehv́re
das hast dv herre in diner hant·
was wont die hoͤhe die tiefe in aller breite
das ist dir vil wol erkant·
din wisheit sin in ellú herzen leite·
niekein ding so tǒgen wart·
das es dir were vor verspart·
in dem kreis alles vmbevange· dir edeler got sich nie kein ding entseite·

Des vaters segen des engels wort·
des heiligen geistes gebender flvs den hohen hort·
dir gab Marie in dinen lib· den got der aller dinge ist ein waltere·
der vs dem himel zů dir nider·
ein got kam vnd dv in sinem vater wider·
santost beide menschen vnd got· des mv̊ter dv in hoher wirde were·
vnd den dv tǒgen svnder bar·
hatost vmbevangen in dir reinekliche·
der ellů ding vmbevangen gar·
hat wasser luft fv́r erde vnd himelriche·
des were dv ein klose hiê·
dvrch das als vnd swas dir îe·
von im selden wider fůr so hilfe das v́ns niht sin gnabe entwiche·

Was ist das den besten rat·
got ze troste der kristenheit gegeben hat·
der v́ns mit im gehvldet hat[WS 1]· vnd sinen strengen zorn hin geleit·
das ist erbermde als man giht·
dv́ welt gote vs herzen nie bekomen niht·
ê si im hat geraten wol· dc er vns loste mit sime tode als man v́ns seite·
wir mvͤsten alle verlorn sin·
wer v́ns sin marter niht komen zetroste·
svs hat er bermde geholfen hin·
der kristenheit von iemer werender roste·
wand si hat gote erraten an·
das er vf die erde· kan·
vnd mensche wart dvr das er v́ns von grimmeklicher not zv̊ im erloste·

We v́ns dar vmbe das wir gar·
an mangen rehten tvgenden sin alse bar·
vnd ǒch des tievels boͤser rat· so dike gesiget vns krefteklichen an·
das la dir herre geklaget sin·
vnd hilf das wir v́ns ziehen in den willen din·
vnd wir vmbe dich erwerben got dc v́ns noch teke diner selden vân·
vnd er v́ns leite an die stat·
da ieklich mensche erkennet sine schvlde·
also das v́ns nit spreche mât·
der tievil vnd wir finden dine hulde·
dât ze ivngest rihten wilt·
dar v́ns allen ist gezilt·
denkent wie iemerlich er stê· ze der selben stvnt der gottes zorn tuldê·

[191v] Die wisen iehent vnd ist ǒch war·
das kein vnmaze nie gewerte niht drizeg iar·
dar vmbe man gerne phlegen sol· der rehten maze dc ist wisliche
was menschlich ist dc weret gern·
wer aber niht wil die vnmaze gar verbern·
dem wêne ich dc des rat· sere wone bi vnd ime gottes hvlde entwiche·
dv́ maze eret ellú ding·
so brv́wet vnmaze manig hǒbet sv́nde·
dv́ maze ist ganzer tvgende vrspring·
so kan vnmaze brechen glúkes gv́nde·
maze machet gottes gvnst·
so hat vnmaze der helle brvnst·
gemeret wer niht maze empfligt· das ist an heren ein gar boͤse vrkv́nde·

Owe dir wandelbere welt·
das wir dir dienen vnd so reht boͤs ist din gelt·
vnd din valscher arger lon· ze ivngest ǒch so bitter ende hat·
din gar vnstete svͤzekeit·
schafet dc wir dir volgen nach in werendes leit·
da man sich gerne hvͤten vor solte vnd haben gv̊ter lv́ten rat·
wie man dir gesiget an
so dc man niht in dinem dienest erstvrbe·
gedenkent frǒwen vnd man·
wie lib vnd sele da so gar verdvrbe·
vnd gewinnen got ze frv́nde enzit·
der tot vor v́ns verborgen lit·
wan der were verlorn gar der niht sîn hvlde an dirre werlt erwrbe·

Owe das wir vf irdensch gv̊t·
so sere stellen beide sin vnd ǒch den mv̊t·
vnd wir es alles mv̊zen lan· gar hinder v́ns so wir von hinnen scheiden·
es kan v́ns dort niht gevromen·
wan das wir dvr got geben han das mag wol komen·
ze troste der sele vnd vristen vor dien iemer wernden grozen starken leiden·
da sv́len wir gedenken an·
vnd geben den armen vmbe die gottes minne·
sid wir anders niht enhan·
des gv̊tes so wir nv mvͤzen scheiden von hinnen·
wande ein swaches linin tv̊ch·
spricht ieman es ist boͤse man giht enrůch·
si lant v́ns gerne varn vmbe dc gv̊t svs sint geschaffen v́ns erben sinne·

Got siner hohen wirdekeit·
hat an dv́ reinen werden wip so vil geleit·
das ieman kvme volloben kan· nach rehte ir ere vnd ǒch ir wiblich gvͤte·
si hant der selden meisten hort·
an dirre werlte dar zů den himel von ime dort·
erfúllet vnd gottes wille wirt von ir erwendet grosses vngemvͤte·
wirdet vil manigem werden man·
der niht koͤnde vroͤlich werden wan von wiben·
wan man si niht wan bliket an·
das kan vs herzen herzeleit vertriben·
wem danne ir gvͤte wonet bi·
der mv̊s sin aller sorgen vri·
wer hat ir gvnst der sizet vf dem glúkes rade·
des wúnsch ich wol ir libe·

We im swer swechet frǒwen namen·
mit[WS 2] arger rede dvr boͤse tat der mag sich schamen·
vor in vnz an sin ende wol· das er vnwirdet so ir wirdekeit·
vnd er si niht geniessen lât·
das si got nach siner mv̊ter gebildet hât·
vnd ǒch ir reiner werder name den meisten teil der welte froͤiden treit·
er ist hie ein verschamter man·
vnd wirt in enre welte gotte vn mere·
wer in niht ir lobes gan·
vnd sprichz wol als in gemêsse were·
wand si sint ein gar reines tach·
das teken kan fúr vngemach·
vnd machen manigen werden man· der trvrig ist das er wirt froͤidebere·

Was hat der froͤiden meisten hort·
an dirre welte dem man billich gvͤtú wort·
sol sprechen so man beste kan·
ze lobe ze eren vnd ze wirdekeite·
das hat ein minnekliches wib·
dv́ al so hat behvͤtet iren reinen lib·
das si ir herze vnd ǒch ir sin vnd ir gemvͤte iê valscher tat entseite·
die sol man an der welte gar·
fúr alle creaturen hie wol eren·
wande si ist ce der himelschar·
erkorn das si die sol dort meren·
vmbe ir reines stetes leben·
wil ir got hie wirde geben·
vnd dort ir sele vnd ǒch ir lip ir werdendes wesen in ganze froͤide keren·

Gelúkes rat nit stilte stat·
vro selde dv́ es tribet das erzeiget hat·
an vieren [192r] die da wonent bi· das es vmbe lǒfet zaller stvnt·
dem ersten gat v̂f an dem gv̊t·
der ander der hat vollen schrin vnd richen mv̊t·
dem dritten swint sin richeit abe· dem vierden ganze armv̊t ist kvnt·
hie bi ist v́ns bezeichenlich·
der werlte manigvalt grôs vnstete·
dc einer wirt arn der ander rich·
selig were der das rat mit heil vf trête·
vallet aber er andert nider·
er kvmet kvme iemer me hin wider·
da horte fúr das ein man sin gv̊t mit der lúte gvnst vnd ǒch mit gotte hête·

Dv́ milt ist ganzer tvgend ein hort·
dv́ milte hoͤhet hie nider gebvrt vnd hvldet dort·
gegen gotte man megde vnd ǒch dv́ wip·
vnd hilfet maniger sele vs grôzen noͤten·
dv́ milte ob andern tvgenden swebt·
sam der adelar ob allen vogeln so nv lebt·
dv́ milte nimet hie laster abe· dv́ milte kan vor gotte dv́ sv́nde toͤten
dv́ milte wirdet kv́nigen leben·
herzogen grauen vrien vnd dienestherren
dv́ milte kan pfaffen fv́rsten geben·
ere vnd ǒch machen das in laster verren·
mv̊s milte ist eren obdach·
von milte v́ns dv gnade beschach·
das got dvr v́ns leit den tot· vnd er v́ns gerůchte vs wernden noͤten keren·

Dv́ kerge ist aller vntvgenden stam·
dv́ kerge schv́chet ere hin vnd machet zam·
laster vntrúwe lvge vnd meintat· bi mannen wiben megden vnd den frǒwen
dv́ kerge nidert hohen namen·
dv́ kerge machet das sich maniger hie mv̊s schamen·
vor reinen wiben vnd er mag in himelriche[WS 3] niemer got beschǒwen
dv́ kerge der helle schar dort hat·
gemeret dv́ kerge ist ein solich sv́nde·
dv́ wisen kan an boͤse tât·
dv́ kerge lêret vil der boͤsen fv́nde·
da mitte man mag erzúrnen got·
vnd brechen sin vil hôch gebot·
dv́ kerge schv̊f den ersten mort der manigen braht hat in der helle bv́nde·

Gv̊t mv̊t vil hoher eren birt·
gv̊t mv̊t kan machen das ǒch manger milte wirt·
des herze in kerge were verkliben· ob in gv̊t mv̊t nit wîste sere der von·
gv̊t mv̊t kan túren edeln man·
gv̊t mv̊t die megde vnd ǒch dv́ wip wol wirden kan·
gv̊t mv̊t machet das man niht verzaget· an gotte dc han wir dike wol vernomen·
gv̊t mv̊t machet das ein man sin ere·
gemeren kan· gv̊t mv̊t ǒch trvren swendet·
gv̊t mv̊t heilt manig grôsses ser·
gv̊t mv̊t den lv̊ten dike froͤide sendet·
gv̊t mv̊t machet das man lange lebt·
gv̊t mv̊t ǒch dike nach eren strebt·
gv̊t mv̊t vntrúwe vnd arge sinne vnd valsche rete von manigem herzen wendet·

Suͤsse rede von valschem mv̊t·
manigem manne dike grossen schaden tv̊t·
da er sich wol hvͤte vor swer redte als der sin geschaffen ist·
dar vmbe gedenket ein boͤswiht·
gib svͤsse rede so getruwet man an dir niht·
das dv ein valsches herze habist· ald bi dir wone kein vngetrúwer list·
da mitte mahtu geraten wol·
dem bider man vil gar vmbe al sin ere·
der sinne ist nv vil maniger vol·
wê im der sin ge mvͤte dar an kere·
vf also lasterliche tât·
sîn kan ǒch niemer werden rat·
wer im lat gesigen an also vntrúwe mit ir valschen lere·

Anmerkungen (Wikisource)

  1. Vorlage: het.
  2. Vorlage: mt.
  3. Vorlage: himeriche.