Dahero vonnöten / das die winckel vnd seiten / als theil deß Triangels / in gewisser proportion gegen einander stehn / vnd mit einer bekandten zahl müssen außgesprochen werden können.
Solche proportion aber (weil aller winckel mensur ein Circkeltrumm oder krumme lini ist / so auß dem spitzen deß winckels / als Centro / gerissen wirdt zwischen beyden linien / so den winckel einschliessen: vnd man aber bißhero kein gewisse proportion der krummen linien gegen den geraden erfunden hat / auch vielleicht nimmer finden wirdt) kan man nicht wissen / es sey dann / das an statt gemelter krummen linien / als mensurn deß winckels / andere gerade zu dem Circkel appliciert / vnd deren grösse / so sie gegen dem halben Diameter desselben Circkels haben / gegeben werde. Solche gerade linien nun / die zu dem Circkel appliciert / vnd an statt der krummen masse deß winckels genommen werden, seind nichts anders / als die also genante Sinus, Tangentes vnd Secantes, von welchen in volgender kürtzen instruction dergestalt soll gehandlet werden. Erstlich sollen die termini vnd wörter / so in dieser lehr gebreuchlich / beschrieben vnd erkläret: Zum andern / wie man die tabulas Sinuum etc. gebrauchen / vnd darinn nachschlagen soll / gewiesen: Endtlich gelehret werden / wie man alle vnd jede vorgebene Triangel auß gemelten tabulis solvirn, vnd jhre so wol seiten als winckel erforschen soll.
Matthias Bernegger: Manuale Mathematicum. Straßburg: Paul Ledertz, 1619, Seite 14. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Bernegger_Manuale_014.jpg&oldid=- (Version vom 31.7.2018)
