perpendiculariter vnnd bleyrecht auffgerichtet ist an dem ende deß diameters bey dem einen ort deß vorhabenden arcûs, vnd geht biß zu der secante, welche auß dem centro durch das ander ort desselben arcûs gezogen ist.
Als LC. ist die Tangens deß arcûs BC. wirdt darumb also genennet / weil sie die circumferentz nur berühret / vnd nicht durchschneidet. Von andern wirdt sie geheissen Prosinus, vorsinus / dieweil sie vor dem sinu steht / vnnd gegen demselben parallel, das ist / in gleicher weit stehent: Item Adscripta, ein hinzu gerissene lini: weil sie an / vnd nicht durch die circumferentz gezogen wirdt. Die tabula Tangentium wirdt sonsten tabula Adsctiptarum. Item tabula Faecunda genennet.
15. Secans, ein schneidende lini / ist die / so auß dem centro vberzwerch durch das eine ort deß vorgebenen arcûs hinauß biß zu der Tangente gezogen wirdt. Als AL. ist die Secans deß arcûs BC. Diese wirdt von andern genennet hypotenusa, oder subtendens, weil sie einen rechten winckel (als hie LCA.) subtendiret, vnd gegen demselben vber stehet: Item Transinuosa, ein lini / so vberort / vber den sinum rectum gezogen wirdt. Die Tafel der secantium wirdt sonsten genennet tabula hypotenusarum, Item tabula benefica.
Matthias Bernegger: Manuale Mathematicum. Straßburg: Paul Ledertz, 1619, Seite 21. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Bernegger_Manuale_021.jpg&oldid=- (Version vom 31.7.2018)
