der sinus 3974148. in der Tafel gesucht / gibt mir zur lincken den arcum 23°.25′. Item der sinus 9112835. gibt nur zur rechten / den arcum[1] 65°.41′.
Ob man aber zur lincken oder rechten hand suchen soll / wirdt darauß abgenommen. Ist der vorhabende sinus kleiner als 7071068. (welches ist der sinus deß halben quadranten 45°.) so sucht man jhn sambt seinem arcu zur lincken: wo grösser / zur rechten hand.
Also auch wann die tangens kleiner / als 10000000. Item die secans kleiner ist als 14142136. so werden sie / vnd die jhnen respondierende arcus, zur lincken: wo grösser / zur rechten genommen.
Wann der vorhabende sinus nit eben gar eigentlich in den Taflen steht / so nimbt man deß nechst kleinern oder nechst grössern seinen arcum. Dann ob wol solches nit eben praecisè der rechte arcus ist / fählet er doch nit gar vmb ein erste minut / welches kein mercklichen irrthumb verursachen kan. Als 7087622. ist zwar nit eben genaw vnder den sinibus zufinden: derwegen der arcus deß nechst kleinern sinûs 7087504. nemblich 45°.8′. zu nemen ist.
Wann man aber je gar genaw auch mit anderten minuten den arcum suchen wolte / so wirdt widerumb pars proportionalis gesucht / vnd damit procedirt / wie volgendes Exempel außweiset. Der sinus seye 2863480. dessen arcus zusuchen ist. Weil man aber solchen sinum nit praecisè findet / so nimbt man den nechst kleinern vnd nechst grössern / nemblich 2862458. vnd 2865245. jener von diesem subtrahirt / gibt beeder differentz 2787. welche hernach in der Regel Detri, vornen gesetzt wirdt.
- ↑ Vorlage: arcnm
Matthias Bernegger: Manuale Mathematicum. Straßburg: Paul Ledertz, 1619, Seite 27. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Bernegger_Manuale_027.jpg&oldid=- (Version vom 31.7.2018)
