so dividiere sie mit 3. deß quotienten 7895. quadrat wirdt in der Tafel gefunden 62331025. dieses multiplicier mit dem quadrat deß theilers 3. nemblich mit 9. kommen 560979225. welches ist das eigentliche quadrat der vorgebenen wurtzel 23685.
Ein jede zahl ist entweder ein perfect vnd vollkommenes Quadrat / dessen eigentliche gewisse wurtzel man haben kan: oder aber sie ist ein surdus numerus, deren rechte vnfählbare Quadratwurtzel man nicht kan finden / sondern man muß sich mit einer wurtzel begnügen lassen / die sich der rechten zimblichen nachöhmet. In beeden arten wirdt also Procedirt. Erstlich theile die vorhabende zahl ab in jhre begriff / also das zur rechten hand angefangen / vnd je nach zweyen Ziffern ein strichlein gemacht werde. Welches darzu dienet / damit man in der Tetragonischen Tafel desto behender nachschlagen möge. Dann soviel derselben begriffe seind / soviel ziffer wirdt auch die Quadratwurtzel haben. Zum andern vorhabende zahl suche in der feldung der Tetragonischen Tafel / vmb dieselbe gegend / da die wurtzlen von soviel Ziffern stehn / als viel man begriff hat: oder / da die quadrat seint / die eben von soviel Ziffern vnd deß anfangs / wie das deinige. So nun eben dein zahl in der Tafel steht / ist sie ein rechtes Quadrat: dessen wurtzel ist die zahl / so zusammen gesetzt wirdt auß den zu oberst stehenden Centenarijs, vnd der andern zahl vnter 100. so nebens auff der lincken seiten steht.
Matthias Bernegger: Manuale Mathematicum. Straßburg: Paul Ledertz, 1619, Seite 266. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Bernegger_Manuale_266.jpg&oldid=- (Version vom 31.7.2018)
