Seite:Briefe an Matthias Mulich.pdf/40

aus Wikisource, der freien Quellensammlung
Fertig. Dieser Text wurde zweimal anhand der Quelle korrekturgelesen. Die Schreibweise folgt dem Originaltext.

bestelt Hans Hoter wol, yk hape, gi bliwen dar yo so lange nycht. Item, leve Mattes, hebbe gi den drogen fisk noch nycht kregen, yk sende jw wol wat, men me kant dar so owel hen krigen.[1] Item, leves Mattes, wen gi Hans Hagenow schriwen, so moge gi em nycht schriwen, dat gi nycht na secht hebben willen,[2] wente he secht na alle man, wat gi em schriwen; he ys en selsen mynske.[3] Item, myn alderleveste Mattes, yck wolde, dat yk dissen fastelawent bi jw were, dar gewe yk wol wat vmme, mer als gi my to lowen; al[4] hebben my gode frvnde to gaste beden, noch were yk lever bi jw; doch dyt wil nv nycht syn, dar mach yk my sulwen yn trosten; dar ys nen tit so lanck, yt nymt yo enen ende; yk hape, dat wi yo noch ens wedder to hope kamen. Hir mede syt gode befalen vnde segget allen goden frvnden gode nacht vnde de mome vnde de svster beden jw fele ghode nacht. Geschrewen yn Lubeke vp svnte Falentines dach anno XXIII.

Kattrine Mvlich. 
j. a. l. f. 


No. 22. Von Matthias Scharpenberg.
1523, Febr. 15.

Mynen getruwen vnde wylligen denst alle tyt to voren. Weth, leve juncker Matz, dat wy noch van der gnade gadts fryss vnd gesundt sindt, der geliken horen wy ock alle tyth gern van jw vnde allen guden frunden. Item, leve juncker, so hebbe yck jw by deme Norenberger baden gescreven, wo ick myt m. g. h. van Holsten vnde dar myt jwen schuldenern gevaren sy, hape yck, de breff sy jw worden. Item so ys m. g. olde her van Holsten hir gewessen, kam hir an vnser frowen lychtmyssen dag des morgens frw to vyffen vnde reth des vrydages[5] des morgens frw to vyffen weder wech vnde vnse heren weren to em in de herberg; yck vorse my, dat se noch eine nyge vorbuntnysse hebben gemaket idt wert syck in kort woll vthteren,[6] wes se gemaket hebben; men secht, de Jutten hebben en vor einen heren karen[7] vnde syn vam konyng treden;[8] wes des ys, werth men yn kort

  1. ↑ aber man kann es so schwer dahin bekommen.
  2. ↑ was ihr nicht weiter erzählt haben wollt.
  3. ↑ ein seltsamer Mensch.
  4. ↑ obwohl.
  5. ↑ es war der 6. Februar.
  6. ↑ äußern.
  7. ↑ gekoren, gewählt.
  8. ↑ getreten.
Empfohlene Zitierweise:
Carl Friedrich Wehrmann (Hrsg.): Briefe an Matthias Mulich, geschrieben im Jahre 1523. In: ZVLGA 2, 1867, S. 296–347. Friedrich Asschenfeldt, Lübeck 1867, Seite 335. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefe_an_Matthias_Mulich.pdf/40&oldid=- (Version vom 31.7.2018)
Von „https://de.wikisource.org/w/index.php?title=Seite:Briefe_an_Matthias_Mulich.pdf/40&oldid=3224347“