et beste doen mer my en sin noch ghene sardoke komen unde ik mene Peter sole binnen kort hir sin unde so sol he vort to Venedien wart. Item Hinrik, wat breve my van ju komen sin, dar wel ik et beste in doen. Got si met juo beyden. Ghebeidet alle tit over my. Ghescreven op den derden dach in jullio 1409.
Item so seget Hannes Loskinghe, dat louwant en si noch nicht komen dat my seer vorwundert na deme he my seghede.
22. Elisabeth Vechinhusen an Hildebrand Vechinhusen in Brügge s. a. – etwa 1409. Ende Oktbr.
- Rev. St.-A. Orig. Adr.: An den erbaren mann Hildebrant Vockinchusen to Brugge littera. Darunter von H. V.’s Hand: 1409, 20 in november Sivert sal unser selschap weddergheven 36 marc 10 sl. Lub. van den 18 marc Prusch 8 scot.
Vruntlike grote vorscreven. Wetet myn leve bole Hildebrand, dat Tütke Swartte wol over gekomen is, Got sy gelovet. Item so wetet, dat ik untfangen hebbe van Boden van Stockam 250 marc Lub. alles geldes und darto heft he betalt de 24 ℔ gr. und he secht uns, he en hebbe noch neyn gelt mer in gemant. Item so wetet, dat ik untfangen hebbe de 800 marc van myns bolen Thomases weghen. Item van Tytken Swarten wegen 83 marc. Item van Tyten wegen 71 marc 4 sl., summa tohope 1203 marc 4 sl. Hirop hebbe ic ju weder gesant 1500 stokvisches, de stunt met alleme ungelde wentte to Hamborch 82½ marc myn 6 den. Hirop hebbe gy untfangen van Johannes Hoenstene 24 marc 11 sl. 4 d. Item sende ik ju by Herman Platensleger 20 Gellerssche gulden und 10 cronen. Item sende ik ju by Cord Schellepeper 25 Gellerssche gulden und 5 cronen. Item sende ik ju by Hanse van der Merke 16½ nobelen und 7½ cronen und 4 Gellerssche gulden, summa an gelde, dat ik ju sant hebbe 83 marc und 1 sl. Item so hebbe ic Hanse van Mynden gegeven 36 marc 10 sl. Lub. vor de 18 marc Prusch 8 schot.
Item so hebbe ic in der Venedyesschen selschop gelecht 677 marc Lub., summa, dat ik weder utegeven 900 und 3 marc 14 sl. myn 2 den. Summe, de ic van desseme vorbenomeden gelde schuldich blyve 302 marc 6 sl. 2 den, alle tyt to guder rekenscap. Item so wil ik de 30 ℔ gr in Prusen maken tegen wynachten by Gosschalke van den Boekele. Item bevol ik ok Hanse van der Merke 1 stro wasses, dat sende hir Reynolt Swartte und hort in Tyten selschap. Item so hadde ik ju nu gerne gelt gesant, men ik en kondes hir nicht bekomen op dusse tyt, ik wil gerne des besten ramen, dat ik ju gelt to der hant schicke, also ic erst kan. Item so wetet, dat hir nu de stede tohope weren des vridages vor sunte Symon Juden dage[1] und se menden, se woldent gevatet hebben tuschen deme olden rade und deme nien und dar en wart do nicht af und se hebbet enen anderen dach geramet, de sal wesen to alle Godes hilgen dage[2] und so hopet men, et solde dan gud werden.
Briefwechsel Hildebrand Veckinchusen, Seite 30. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_030.jpg&oldid=- (Version vom 31.7.2018)
