Nicht anders op dusse tyt, men ik wil gerne des besten ramen by allen dyngen.
Item so wetet, dat Johan van Staden wol op de Elve komen is, Got sy gelovet. Item so wetet, dat Hinric Losekync den terlinc Tomasche laken herwart geschepet heft, want hir kumpt, so wille wy gerne des besten darby ramen. Hirmede vart wol in Gode und grotet myn suster Greteke sere und alle vrunt. Gescreven des dynxdages vor alle godes hilgen dage.
23. Elisabeth Veckinhusen aus Lübeck an Hildebrant Veckinhusen in Brügge 1409, 3. Dezbr.
- Rev. St.-A. Pap. Eine Adresse fehlt; wohl aber hat eine andere Hand als die der Briefabsenderin oder des Schreibers auf der Rückseite an 3 verschiedenen Stellen bemerkt: Veckynchusen Slyper to Kolne – dyt es Lysseken rekenschap – koppye van Lyseke breyve an Hildebrande.
Vruntlike grote vorscreven. Wetet myn leve bole Hildebrant, dat Tytke Swarte van hir toch des sundages na sunte Andreas dage[1] to deme Sunde over lant und wolde vord in Prusen. Item so wetet, dat Clawes Swarte de 2 terlinge Kamerikeschen und Akeschen lakene vorkoft hevet und he heft ghegeven de Akeschen lakene, elk laken vor 19 marc Sundesch; und de man het Herman Kemerynge und salt betalen up pinxten; und helden to kort 24½ elen und de slachdok de is noch unvorkoft. Item de terling Kamerikesche heft he ghegeven, elk laken umme 18 marc Sundesch, umme rede ghelt, des sal he betalen 2 laken up wynachten und 4 laken up vastellavende; de slachdok de is noch unvorkoft und se holden to kort 3 elen und 1 quartir.
Item so is de terling Tomaschen laken wedder van Schonen komen und de heb ich em ok ghesent und Tyetke Swarte, de wolde eme dar seggen, wes he mede don solde. Item so sin wy es eens gheworden mit Boden van Stochem, dat he minen bolen Johanne van der Brugghen geven sal up suente Johannes dach to middensomere[2] vor unse deel van den lakenen, de noch unvorkoft weren, 264 marc 8 sl. Item so hebbe ich van Boden untfangen 300 und 14 marc Lub. und he heft sulven betalet de 24 ℔ gr., de gi hir overkoften und he secht uns, he hebbe neen rede ghelt meer, dat uns boren mach, wente wenner he mer geldes inmanet, so wil he id maken bi Hanse van Minden. Item so hebbe ik untfangen van mines –[3] Thomases weghen 800 marc und van Tyetke Swarten weghen 83 marc und van Hinrych Tyeten wegen 70 marc 4 sl. Item so bin ik ju schuldich van miner eghenen weghen to betalende ½ groen Ypersch, summa 3 ℔ 2 sl. Und juwe halve is noch unverkoft und juwe halve scharlaken nemet Tytke Swarte mede to Prusen wart. Item so hebbe gi untfangen van Hans Hoenstene 24 marc 11 sl. 4 ₰. Item sende ik ju bi Herman Platenslegher 20 Ghelressche gulden und 10 kronen. Item sende ik ju bi Konraet Schellepeper 25 Ghelrsche gulden und 5 kronen. Item
Briefwechsel Hildebrand Veckinchusen, Seite 31. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_031.jpg&oldid=- (Version vom 31.7.2018)
