mer men dat gy eme nicht scryven und neyn dync op ju nemen doe van der selscap wegen eynych gud to kopen in dey selscap. Gy mosten ok sulven som als profyt dencken und doen met wessele met kopen und met vele saken und senden Peter somals laken und allerleye ander dync dat gy vornemen, dat dey Norenberger kopen und Lumbarden und ander lude, wand gy mochten dar vele dynges vornemen dat ju Peter noch wy nicht al scryven kunnen. Doet wol und ramet al dync to hertten van der selscap wegen also gy best kunnen und spard neyn dync, wand uns allen macht hyrane. Ok wundert Slyper und my, warumme gy dey hermelen dar holden, nu dey koft syn. Ramet des besten in al und nemet dyt int beste und gy dorven Slyper dyt nicht scryven noch Peter, dat ic ju dyt screven hebbe.
(Rückseite des Blatt 1.) Leyve broder my duncket al dync wel met den van Lubeke anders vallen dan vele lude meynt hadden dat komet al by des konynges doede to, hedde dey konync ghelevet, men solde bynnen kord ander tydynge vreschet hebben; ic hebbe al dync in den besten daen, Got voget noch to den besten, des behove ic wol. Gy mogen wol to Lubeke komen und varn wan gy wellen bynnen eynem jare ofte twen jaren darna dat et ju punttet, gy hebben ju borgerscap nicht opseget, ok sal ju dey olde rat wol gunnen juwe beste to proven boven dat ic vor ju lovet hebbe. Scryvet to Lyflande ward dat sey den achtebreyf neymande wysen noch lesen laten. Ic wolde ok dat en to Bruogge neymand lesen hedde.
Item also gy scryven vele dynges to slychten, dat es al myn wylle wol, jo wy unse dync slechter holden jo my leyver es, ic hope noch er paschen also vele geldes in unse selscap weder to brengen also ic darin schuldych sy, wand ic hope umme myn schulde solen ummer betalt werden bynnen desser tyt; hevet ok dey selscap nu schaden van my, ic welt wol weder betern, ef Got wel, op dat ic leven mach, welle gy ok Hynric Losekynge und Hans lenger in unse selscap hebben dat scryvet my. Dey 3 jonge broder syn wederleget. Van juwer dochter und myner dochter wegen helppet en des besten. Got geve to guder tyt dat hevet my kostet mer dan 200 marc Lub. Dat eyne met den andern wand ic hebbe em gelt tovorn geven und darop weder leget also ic ju hyrnest al wol scryven sal, hedde ic to Lubeke bleven und by nerynge bleven, hedde ic wolde noch bet ghedaen hebben. Wel my ok Got helppen, so wel ic al dync wol betern. Sorget nicht, al dync sal noch gud werden, ef Got wel, op dat ic noch 1 tyt leven mach. Got geve beholden vard und geve dat uns des Tomassche laken weder werden und dey vedder so mach al dync gud werden. Ghescreven met hast 14 dage na sunte Johannes dage 1410 jar.
30. Sivert Veckinhusen in Köln an Hildebrand Veckinhusen in Brügge. – 1410 Juli 21.
- Rev. St.-A. Orig. Pap. Adr.: An Hyldebrand Veckynchusen to Bruogge littera detur.
Broderlyke leyve vorscreven. Wetet dat ic juwen breyf wol vornomen
Wilhelm Stieda (Hrsg.): Briefwechsel Hildebrand Veckinchusen. Leipzig 1921, Seite 38. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_038.jpg&oldid=- (Version vom 31.7.2018)
