myne ic ju dat gelt an aftoslan also dei 44 marc 12 sl., aldus so solde ic dan noch op ju to kopen 230 marc 4 sl. Lub. Anders ein weit ic ju nu nicht mer to scriven van dessen stucken. Scrivet my ein antworde hirvan myt den ersten; anders nicht men vart wol in Gode. Gescreven 2 dage na sunte Jacopes dage 1410 in Brugge.
32. Sivert Veckinhusen in Köln an Hans Loseking in Brügge (?). – 1410 Juli 31.
Vruntlyke grote vorscreven. Wete Hans Losekync, dat ic nu breyve van dynen broder hebbe, dar scryvet hey my inne, dat hey dy und Lodewyge und Reymer und Hildebrand ghedaen hevet van mynem gelde op wederleggynge over al 85½ marc Lub. Dyt salt tu aldus vorstaen. Ic gaf ju 4 brodern 20 marc Lub. tovorn und doe ju 20 marc Lub. dartegen op wederleggynge, dat es tohope 40 marc und hey hevet ju noch op dat gelt daen, dat gy buten hadden dat dynen jungen brodern horde 45½ marc, dar hevet hey ju 45½ marc van mynen gelde tegen doen in den namen Godes. Dyt is tohope dat hey dynen brodern und dy doen hevet met deme, dat ic ju geven hebbe, also vorscreven es 85½ marc Lub. und wes tuo tovorn haddest, dat horde my half to also duo wol west, dar was nicht utscheden. Dyn broder meynde wol, du heddest gelt vordeynt met lopen to sunte Gallen und met deme dat du syn dync vorstondest to Brugge, dat soldestu allene holden, doe segede ic weder so soldestu ok dey kost to Brugge und al umme betalen, also dat wy des eyns worden, dat my al half solde tohorn, dat du haddest, dat en were, dat dy sunderlygs gelt ut Westfalen were komen.
Item so ward ic met dynem broder hyrvort eyns op dey sulve tyt, dat al dat du und dyne jungen 3 broder hebben und hanttyren in kopenscap, dat sal my al half horen, nichtes utscheden und du und dyne broder solen neyn gud buten hebben ofte hanttyren in neyne wyse, dat en were dat ju eynych gelt ut Westfalen queme ofte anstorve, dat sole gy my scryven, dar sal ic ju also vele tegen doen op wederleggynge und welle gy eynyge vry selscap met eymande maken in Prusen ofte war gy meynen, dat gy profyt doen mogen, dat es myn wylle wol, men dat sole gy my vorscryven und sal my mede gelden also vorscreven es. Hans aldus hebbe wy desse vorwarde vast maket und ic hebbet aldus in myn bok screven, aldus scryf du dyt ok in dyn bok beschedelyken; ok hebbe ic dyt mede bescheden, dat du noch dyne broder nicht van my scheden solen noch van mynen kyndern aldewyle gy met eymande selscap holden wellen und op dat et myne gadynge es selscap met dy und dynen brodern to hebben by alsolken vorwarden also vorscreven staen, hebbe ic dy und dynen broder dyt vordel daen und geve darumme scryftlyk und segge ok mynem broder ofte du dyt aldus holden wolt alse vorscreven is vor dy und dyne broder so mach ic my hyrna rychten. Und soes myn wylle, dat myn broder und du denckebreyve hyrop maken eyn ut den andern sneden, op dat elk vorward sy in tokomenden tyden. Wan dat scheyn es, so wellen myn broder und ic seyn, dat wy ju vord des
Briefwechsel Hildebrand Veckinchusen. Leipzig: S. Hirzel, 1921, Seite 4. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_041.jpg&oldid=- (Version vom 31.7.2018)
