wente solde ik pagemente betallen, ik moste ok dat gelt van juwen wegen weten. Hirumme zo vordreget ju enander. Hebbe ik wat utgeven, dat ju tokomet, dat nemet van juwen broder.
36. Sivert Veckinhusen aus Köln an Hildebrand Veckinhusen in Brügge. — 1410 Aug. 19.
- Rev. St.-A. Orig. Adr.: An Hyldebrand Veckynchusen to Brugge littera detur. Darunter von Hild. Veck.’s Hand: 1410, 27 in den ouste.
Broderlyke leyve vorscreven. Wetet dat ic juwe breyve und rekenscop al wol vorstaen hebbe und dey ic al over seyn wel und scryven dey rekenscop in myn bok und schelt my ofte ju hyrnest ergen icht ane, dat sal al tyt to guden rekenscop staen sunder begryp und sunder torn; und my wundert, dat gy nicht also vele umme mynen wyllen doen wellen noch doen doin dat gy al solke gelt opnemen wellen also ic ju doch vele screven hebben, dat gy dey 264½ marc wol op Johan van der Bruggen overkopen mogen und ok dat gelt op Johannes van Mynden van deme naten terlync wandes, dat es vor myn schult nicht betalt also ju Johan van der Bruoggen wol scryven sal. Nemet dat gelt op Johannes van Mynden und op Johan van der Bruoggen; kunne gy nicht 1 ℔ gr. umme 6 marc 6 sl. kopen, so kopet dat umme 6½ marc, ic moet dat gelt hebben, komet dar schaden op, latet my dat eventuor staen. Ic dorfte wol na juwen scryven doen, al welle gy nicht na mynen breyven doen und ok dar nicht an loven. Johannes van Mynden und Johan van der Bruggen solent wol betalen, ok hebbe ic Johan van der Bruggen screven, dat hey dey 264½ marc Johannes van Mynden geven sal, wand gy solent op Johannes van Mynden overkopen al kofte gy 100 ℔ gr. op Johannes van Mynden van myner wegen. Hey leytet nicht weder overkomen, also wol bewet ic my met eme, kopet dyt gelt over sunder suomen al wat dat kostet op mynen schaden, ic wel dar gud vor syn, ef Got wel, ok sole gy dar neyn schaden noch schande van hebben.
Item also gy scryven dat gy also vele afnomen und rekent hebben, also ic der selscop schuldych sy, dat es myn wylle wol und dey 20 ℔ 5 sl. scryvet my ok to, dey ic ju sand hebbe, wand na deme dat gy dey 128 marc 7 sl. afreken, dey ander rekenscop solden unbreken hebben, so kunnen gy nergen in neynen rekenscop vynden, dat ic dey 122 cronen afscreven ofte to rekenscop bracht hebbe. Aldus unbreken my dey 20 ℔ 5 sl. gr.; ic wel al ju rekenscop in myn bok scryven und wat my an elker summa und an der rekenscop unbrekt, dat wel ic ju weder scryven allewege op ju vorbetern. Gy loven Tydeken Swartten worde bet dan mynen breyven. Hedde gy dat gelt overkoft, ic wolde ummer 100 nobelen wedden ofte weder overkomen hedde; dat es my neyn gunst, dat gy nicht doen na mynen breyven na deme dat ic ju dat also vele screven hebbe. Nemet dat gelt op wand, ic moet in der myssen opnomen 400 ofte 500 gulden dey ic dar schuldych sy, darumme suomet dar nicht mede und setet ju to deme gelde, wand ic wel also vele opnemen also dey 2 summe geldes toseggen 464½ marc Lub. Ic kan nicht
: Briefwechsel Hildebrand Veckinchusen. Leipzig: S. Hirzel, 1921, Seite 47. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_047.jpg&oldid=- (Version vom 31.7.2018)
