umme. Scryvet Slyper und my al tydynge in dey myssen to Vrancvord und al umme van allerleye gude und van al wat gy vornemen ut allen landen, dat steyt al umme ovel in der werlde und sunderlynges to der see ward welt ovel staen. Got bewaret al umme. Ghescreven des dynschedages vor sunte Bartolmeus dage 1410 jar.
Item leyve broder also gy my screven, dey rekenscop van unser selscop wat gy untfangen und van ju sand hebben, dat hebbe ic al wol vorstaen des hedde neyn noet wesen, ic holde ju neyn rekenscop van der selscop wegen na, wan gy my screven hedden, dyt hebbe gy to der see ward sand und dyt hedde wy in selscop und wor elk dync were und wat gy tachter ofte tovorn darop wern, so hedde ic bet wyst woe unse dync staen, hedde dan nu dar were my des ghenoch ane wesen overslaet al dat wy in selscop und an gude al umme hebben leget und sand und scryvet wat gy tachter yn, so mach ic dat ok scryven by desse rekenscop und eyn cleyne sal uns ummer nicht schelen, ef Got wel, Got geve beholden vard al umme. Leyve broder kopet ummer dat gelt over und latet des nicht also ic ju vorscreven hebbe, wand ic kan des nicht unbern, ic hadde wyllen eynen knecht darumme to senden, nu gy dat jo nicht opnemen wolden, dey soldet my an gelde bracht hebben, nu steyt dat ovele in allen eynden, men ic vorlate my op dyt gelt und hebbet nu to Lubeke ward screven, dat dar neyn togerynge invallen sal, dar twyvelt nicht ane. My were also leyt, dat dar togerynge inkomen solde als ju; wolde Hans van Mynden dey syden senden, so nemet dat gelt ok op ene. Hans sege gerne, dat gy und hey und ic dey syden in handen heylden, ok hedde sey dey selscap gerne. Est dat gy sey uns nicht kopen wellen, so kopet ummer 1 balle in dey selscap. Kunde gy ok eyn del wytte kopen also ic kofte, doe ic dar by ju was, dar kopet ok wat in al, ramet des besten und beydet over my in al dat ic vormach. Ic wolde dat gy hyr komen kunden tegen den wyntter 4 weken ofte darby umme vele sake wyllen, gy hebben ju borgerscap nicht opseget, ic mochte ju myn hus und reyntte laten toscryven und al dat ic bynnen Lubeke hebbe. Und gy screven my weder to dat wy buten hebben und wolden vele dynges slecht maken op eynen vasten voet, dat wy al umme vor ward worden; scryvet my al ju gudduncken men sal noch bynnen kord vele myes vreschen. Got geve gude tydynge van al umme.
37. Sivert Vechinhusen in Köln an Hildebrand Veckinhusen in Brügge. – 1410 Aug. 19.
- Rev. St.-A. Orig. Adr.: An Hyldebrand Veckynchusen to Brugge littera detur. Darunter von H. Veck.’s Hand: dyt es 1 rekenschop van ein dels unses dynges na myns broders sine.
Broderlyke leyve vorscreven in juwer rekenscop und breyven hebbe ic vornomen, dat gy meynen dat ic der selscop schuldych sy over al 864
: Briefwechsel Hildebrand Veckinchusen. Leipzig: S. Hirzel, 1921, Seite 49. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_049.jpg&oldid=- (Version vom 31.7.2018)
