marc 11½ sl. Lub. Hyran rekene ic ju weder 122 cronen, dat syn dey 128 marc, dey gy meynen, dat ic an der eyrsten rekenscop vorrekent hedde, dey rekenscop was met deme gelde recht, also ic meyne dat ic ju noch wol underwysen welle, doch allewege to guder rekenscop.
Item Johan van der Bruoggen sal des nummer seggen noch scryven, dat hey myn schult met den 264½ marc Lub. betalt hebbe, dey hey von Boden van Stockarn untfenc.
Item ic sande Hans van Mynden 5 balle sardoke, dar hey myn schult mede hevet betalt und Hans van Mynden hevet my screven, hedde gy dat gelt op ene koft, hey woldet wol betalt hebben, doch hey hadde meynt dat gelt van den terlync wandes hedde my tokomen. Gy scryven von 220 marc, ic meyne vor den terlinc wandes sy nicht also vele worden.
Item gy scryven, ic sy ju 36 marc 10 sl. vor dey 18 marc Prusch. Kunne gy dat my bewysen, dat my dey 18 marc Prusch tokomen syn, so wel ic des der selscop nicht reken, men ic wet dar nicht van, des my dencket.
Dyt is overal dat ic ju weder afscryve an der selscop schult 649 marc 2 sl. und noch es an den 30 ℔ gr. 20½ marc 4 sl. to schaden komen na juowen scryven es dat by my tokomen, dar wel ic Lyseken umme vragen, so est mogelyc, dat ic dey gelde.
Item na juowen scryven, so ic ju propper schuldych van Tyten und van Swartten und vor 1 Ypersch laken overal 188 marc myn 6 ₰ Lub. Dat laken wel ic gerne op my reken, men ic wet nicht woe ic dar an kome. Lyseke segede my, sey hadde ju umme ½ laken scryven, so sunde gy er eyn hel Ypersch laken und screven men solde dat halbe op ju eventuor vorkopen, dat steyt noch by Johan van der Brugge unvorkoft, doch so schelt dar nicht ane, ic meyne ummer, dar sole gelt af werden.
Item gy senden my 10 bale rys, wat darvan werd, dat wel ic ju wol scryven, dar es noch men 1 bale van vorkoft.
Item also gy afnemen van unser selscop vor dat ic unser selscop schuldych sy und ju propper schuldych sy by 224 ℔ gr., ic hope nicht, dat des noet sole syn, wan gy nu dey 649 marc 2 sl. weder afscreven hebben und vorkoft hebben dat gelt vorscreven, so mogen gy hyr nest afnemen van elken mannes wegen 150 ℔ gr. van mynen 150 ℔ gr. neme weder af wat ic ju propper schuldych sy und der selscop schuldych sy, dat sal dan also vele clarer werden bynnen desser tyt, so mochte Got geven, dat uns wat gudes ut Lyflande queme und dat wy vele dynges mochten op eynen vasten voet screyven, ic meyne sunder arch allewege to guder rekenscop.
Item also gy scryven van den lasten und van Tyten selscop und van vele andern saken, dat blyvet al staende na der myssen und wel ju dan wol dey rekenscop clar scryven, wes ic van tyden Tyten und unser selscop wegen hanttyret hebben cleyne und grot to eynem gantsen eynde, men ic haddet allewege meynt men solde dey reyntte ut der gantsen selscop betalt hebben, so dorfte men aldus danne na rekenscop nicht holden hebben.
Item doe ic Tyten best rekenscop scref van al deme, dat ic van der
: Briefwechsel Hildebrand Veckinchusen. Leipzig: S. Hirzel, 1921, Seite 50. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_050.jpg&oldid=- (Version vom 31.7.2018)
