solden hebben, doch hebbe gy dat al op ene opkoft, so salt doch wol betalt werden, hebbe gy neyn gelt op ene overkoft, so kopet op ene over also ic ju erscreven hebbe sunder desse 216 marc.
Item scryvet my sunder suomen wat Osborger sardoke dar gelden und ok Lembersches was, wand ic hebbe 6 balle sardoke und ok was, meynet ju to senden, op dat gy gelt maken mochten, wan ic wet, wat dat dar gelt, darumme scryvet my boschet, ic wil ju ef Got wel van Kolnne al tydynge scryven. Dey rys blyvet hyr eyn del unvorkoft, dar sol nicht an wunnen werden. Hyr syn vele nyer gulden, dey hebben hyr den marcket vordervet. Grotet myn suster und al vrunt. Ghescriven des vrydages na unser leyven vrowendage 1410 jar.
Ic hebbe noch opnomen 400 gulden, sole gy utgeven, dar wel ic ju sardoke und was tegen senden, gy solen dey 400 gulden by sunte Mertyn[1] utgeven. Got geve met leyve to leven. Sardoke hebben hyr 91 gulden.
40. Sivert Veckinchusen in Mainz an Hildebrand Veckinchusen in Brügge. – 1410 Septbr. 22.
- Rev. St.-A. Orig. Pap. Adr.: An Hyldebrand Veckynchusen Brugge littera detur.
Broderlyke leyve vorscreven wetet dat ic ju bydde, dat gy geven Knechteken 150 gulden, des sal Boekel 50 gulden utgeven van Johannes Veckynchusen wegen to dancke.
Item sole gy geven Duvel deme Norenberger 300 gulden 14 dage vor sunte Mertyn[2]. Dyt segget en to geven. Lyseke sal ju van Kolnne senden met den eyrsten 5 balle sardoke, dey gevet umme, dat sey gelden wellen, ok meyne ic ju vor sunte Mertyn eyn del geldes to senden to hulppe to juower schult. Nemet vrylyken eyn del geldes op van myner wegen op Johannes van Mynden, hey salt wol betalen also ic meyne. Grotet alle vrunt. Slyper sal ju al dync wol scryven. Ic moet hyr to rechte gaen umme geldes wyllen dat unser selscop angeyt und moet hyr wol 10 dage blyven ofte mer. Grotet myn suster und alle vrunt vruntlyken. Ghescreven 8 dage vor sunte Mychele 1410 jar.
Dey konync van Ungern sal keyser werden, also men meynt und seget. Got geve, dat et nutte sy vor al dey krystheyt. Vorduopet ju in neyn schult in dey Venedyesche selscop, my duncket wy syn hyr al umme ghenoch tachter van der selscop wegen, dat es gud scryven, men dar hord gelt to, wy hebben hyr grote noet leden umme gelt, darumme wachtet ju dar vor schulden und ramet des besten al umme.
Briefwechsel Hildebrand Veckinchusen, Seite 54. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_054.jpg&oldid=- (Version vom 31.7.2018)
