41. Sivert Veckinhusen in Köln an Hildebrand Veckinchusen in Brügge. – 1410 Oktbr. 22.
- Rev. St.-A. Orig. Pap. Adr.: An Hyldebrand Veckynchusen Brugge littera detur. Darunter von H. Veck.’s Hand: 1410, 28 in october 80 ℔ gr.
Broderlyke leyve vorscreven wetet juowen breyf hebbe ic wol vornomen und ghescreven 16 dage in october. Got hebbe lof, dat Albracht van Borcken inkomen es, Got geve, dat wy dar vele inne hebben, so mochtet al gud werden op dat gy und wy al umme ut den schulden komen mochten. Got gevet uns, ward hyr my also bange. Got geve uns eynen guden eynde van al umme.
Item vorkopet dey 5 ballen sardoke, wan dey myn gelden dan gude Oeusberge van den besten ossen und lowen, dat sal uns dey selscop oprychten, wand Slyper beheylt gude sardoke hyr und sande ju dey snoden, darumme maket gelt, war gy kunnen.
Item also ic wol wet, dat gy grot by schult syn, dat my leyt es van al mynen hertten, kunde ic dat wol keren, doch so hebbe ic hyr sproken myt Hans Greveroden, dey hevet my vorkoft 80 ℔ gr., dey sole gy untfangen van 2 luden 14 dage darna dat gy en er breyve wysen und by den breyve syn quyttansyen, dey en gevet nicht van ju, er gy dat gelt hebben und latet ju van stunden an seggen, ofte sey ju dat gelt geven wellen ofte nicht und scryvet my dat wedder sunder suomen, wand ic moet Greveroden dyt gelt hyr geven und betalen bynnen 5 weken und ic hopet ummer to vortogern, also ic best kan und also ic lengest kan, wan ic ummer nicht bet kan, so wel ic dyt gelt weder op ju overkopen op den langesten dach dat ic kan; bynnen desser tyt mochtet beter werden. Were wy al umme desser grote sorge quyt, so moste wy mer bet toseyn dat wy in also groten schulden nicht dorften wesen, wand dat es grote sorge in solken groten schulden to wesen, dey dat wol betern kunde.
Item ic hope wy wellen dey 9300 gulden wol togern noch 4 weken op dat lengeste und bydde ju, dat gy des mynsten schaden ramen, den gy kunnen met der wessele to Venedyen ward, wand wat geldes wy opnemen to Venedyen ward, dat doet uns al dubbelden schaden, wand dat sal dar al unse kopenscap vorderven tegen dat jar, doch wan men nicht bet kan, so moet men doen, alse men best kan, dey wessele moet betalt syn al wat dat kostet.
Item kunde gy met Tydeman Roeden spreken und van eme nemen 400 gulden ofte myn, dat wy dey weder in der mysse betalen mochten mynen hern van Ryge, al neme gy 32½ gr. vor den gulden ofte dat gy werk von eme nemen an dat gelt und vorkoften dat werk al, wat schaden men an desser wessel deden, dat were al gud kop; ic wolde, dat wy 20 ℔ gr. an 3000 gulden schaden doen hedden in dey mysse und dat wy neyn gelt op Peter dorften wesselen, wand dat sal al unse selscop to schaden maken.
Wy hopen al unse gud sy wol to Venedyen mest komen und solde wol al umme gud werden, woe wy desser wessele quyt wern sunder groten
Briefwechsel Hildebrand Veckinchusen, Seite 55. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_055.jpg&oldid=- (Version vom 31.7.2018)
