so moch wy seyn wes wy doen kunden und wat nuttest were. My duochte best, dat dey rekenscap to Kolnen schege und gy darby quemen und eyn van Lubeke. Dyt scryvet gy ok to Lubeke ut ju suolven, dat sey dar al dync also ansetten dat dey rekenscap na paschen scheyn moge also men eyrst kan. Ic vruchte ok, dat in der selscap neyn Lubisch gud blyven moge, sal dey selscap sunder schaden blyven, wand Lubeke moet in ander noet komen. Got betert al umme. Scryvet hyr und to Lubeke und to Venedien, dat men al dync also bestelle, dat dey rekenscap ummer schey met den eyrsten na paschen umme vele sake wyllen. Grotet myn suster und al vrunt. Ghescreven 3 dage na der hyllegen 3 konynge dage 1411 jar.
49. Sivert Veckinchusen in Köln an Hildebrand Veckinchusen – 1411 Jan. 10.
- Rev. St.-A. Eine Adresse ist nicht vorhanden. Das Blatt, das den eigentlichen Brief darstellt, auf beiden Seiten beschrieben, lag in einem anderen kleineren, das nur auf der einen Seite beschrieben ist und auf der Aussenseite den Vermerk trägt: Sivert Arnt Wachendorp.
Broderlyke leyve vorscreven, juowe rekenscap und breyve by Swartten und Wyllem hebbe ic wol vornomen und hebbe der tyt nicht wol, datic sey to eynen eynde oversey, doch love ic wol aldync sole syk nu bet vynden dan also gy vorscreven hadden. Hedde gy dat afslagen, dat Hans van Mynden opbord hevet und gy mede in dey 864 marc und 12 sl. rekent und afslagen hebben, dat hedde also gud an den 864 marc 12 sl. afslagen wesen, also ic dat noch afslaen sal. My schelt darane also ic ju erscreven hebbe 264½ marc Lub. van Boden van Stockam, dey gy my toscreven und torekenden und darnest 220 marc Lub. van deme naten terlync wandes, dey Johannes van Mynden ju rekent hevet.
Item ic hebbe vor 18 marc Prusch gelt utgeven 36 marc 10 sl. Lub. utgeven, dey reken gy ok in dey vorscreven 864 marc 12 sl., dey sole gy afslaen unde my wedergeven van der Venedeschen selscap gelde ofte weme dat tokomet. Gy hebben Lyseken screven, dat sey dat gelt utgeve. Anders heddes Lyseke nicht utgeven. Darumme seyt gy, weme dat tokome, dyt solde my 73 marc 4 sl. Lub. schelen. Und ic hebbe dey eyne betalt und gy wellen, dat noch van my eyns hebben van afreken.
Item also gy scryven und reken in dey vorscreven summa 128 marc, dey an myner rekenscap solden unbreken, dar rekent in dey stede dey 122 cronen und rekent ok vorlos op dey 30 ℔, dey ic in Prusen solde betalen, dat es myn scholt nicht, hedde ic to Lubeke wesen, des solde neyn noet syn ghewesen und ok met Scryvers gelde. Hedde ic to Lubeke, so hedde ie dat wol also wol betalt und utghereydet also ic to mannygen tyden vor ju und my dycke manych dync sunder schaden utrychtede. Al dede ic som tyt schaden umme geldes wyllen, ic rekede my ju und reydde al dync ut sunder schaden also ic best kunde. Also dot recht was
Briefwechsel Hildebrand Veckinchusen, Seite 62. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_062.jpg&oldid=- (Version vom 31.7.2018)
