Item so doet wol und kopet uns eyn gude tunne schon werx. Konne gy dat myn dan 12 ℔ gr. kopen ofte umme 12 ℔ gr. op dey 15 stucke wasses, wand dat gelt mote wy ummer in der mysse betalen, dar holdet bysunder rekenscap van und kopet uns met deme andern gelde dat van deme andern wasse werd guden kop laken, dar gy meynen, dat mest profyt anvallen volle tegen vorjarn ofte wy an den wasse vorleysen op dat wy an den laken weder wynnen mogen; und Arnd wel neyn gud to der seeward eventuoren, wy wellen ju in der vasten al unse gudduncken wol scryven, ramet des besten. Ic wolde, dat gy uns 100 kopele fruetes sand hedden, mest vygen, dar kunde neyn vorlus anvallen, hedden sey uns met den eyrsten komen. In al ramet des besten und beydet over my. Wy wellen ju bynnen kord al dat ander was senden, dat to den 100 synttener hord, des es noch 11 ofte 12 stucke.
50. Sivert Veckinhusen in Köln an Hildebrand Veckinhusen in Brügge. – 1411 Jan. 16.
- Rev. St.-A. Orig. Adr.: An Hyldebrand Veckynchusen to Brugge littera detur. Eine teils neben der Adresse, teils am Schlusse des Briefes stehende Zuschrift von H. Veck.’s Hand lautet: Item broder do ick vornam, dat du hebben mostes dey 80 ℔ gr., do werestu my schuldych 16 ℔ 8 sl., do blef ick dy do 63 ℔ 8 sl. ick love wol dat du dat hevest dey 80 ℔ gr. Ick hebbe hir noch ander breyve dey to dessen ghelde deynen.
Broderlyke leyve vorscreven, wetet dat ic van Lubeke nicht gudes vornemen kan. Got berade uns anders und voge uns to, dat uns gud sy. Ic vruochte dat wy lancsam to Lubeke weder met soller vromede wonen komen to Lubeke also dat vor wesen es und dat were hyr gud wonen, dey hyr nerynge kunde dat men syk mede bergen mochte, dat es hyr kostlyc und wy weten hyr neyne nerynge. Met cleynen gelde kan men syk hyr ovele bergen. My duncket gud, dat gy hyr komen tegen paschen und lyggen hyr 14 dage ofte lenger und beseyn dat hyr hardde wol. Dat es nutte, dat wy al dync hardde wol overseyn und dencken, er wy eynych dync anslaen, wand wan wy uns hyr legern, so endoch uns nicht weder opbroken eynen andern wech weder varn wonen.
Item doet wol und slechtet al unse rekenscap to eynen eynde also gy best kunnen und ic hebbe Hans van Mynden to Lubeke screven, dat hey ju al rekenscap scryven sal dar na moge gy payment opnemen van deme gelde, dat ju und my angeyt, darwan es nicht in myn rekenscap komen, dar na moge gy ju rychten.
Item ic hebbe Hans Bylevelde hartlyken screven, dat hey ju gelt van der syden to Hamborch maken sal sunder suomen. Ic wolde dat wy al unse gud an syden to Brugge hedden, wand dey syde wel duore werden also uns Peter van Venedyen screven hevet.
Item umme dey 5 ballen sardoke, dey gy van myner wegen lest vorkoften, dar doet wol und scryvet rekenscap hyrover, wat dey myn gulden
Briefwechsel Hildebrand Veckinchusen, Seite 64. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_064.jpg&oldid=- (Version vom 31.7.2018)
